Չի բացառվում, որ տարածաշրջանային՝ Վրաստան-Հայաստան-Ադրբեջան, մեխանիզմը մոտ ապագայում գործարկվի. վրացի վերլուծաբան
Նախօրեին Նիկոլ Փաշինյանը հեռախոսազրույց է ունեցել Վրաստանի վարչապետ Իրակլի Ղարիբաշվիլիի հետ:
ՀՀ կառավարության փոխանցմամբ, քննարկվել են հայ-վրացական համագործակցությանն առնչվող օրակարգային տարբեր հարցեր: Բացի այդ, նշվում է, որ Նիկոլ Փաշինյանն իր վրացի գործընկերոջը տեղեկատվություն է փոխանցել հոկտեմբերի 31-ին Սոչիում տեղի ունեցած Հայաստանի, Ռուսաստանի և Ադրբեջանի առաջնորդների եռակողմ հանդիպման արդյունքների մասին:
«Նիկոլ Փաշինյանը և Իրակլի Ղարիբաշվիլին մտքեր են փոխանակել նաև տարածաշրջանային համագործակցությանն առնչվող հարցերի շուրջ»,- ասված է հաղորդագրությունում: Ուշագրավ է, որ հոկտեմբերի 24-ին Վրաստանում էր Ադրբեջանի նախագահ Իլհամ Ալիևը, ով Վրաստանի վարչապետ Իրակլի Ղարիբաշվիլիի հետ բանակցություններում չթաքցրեց, որ այցն ունի տարածաշրջանային նշանակություն: Ալիևը, ի թիվս այլ հարցերի, ասել էր.
«Մենք կարծում ենք, որ ղարաբաղյան հակամարտության ավարտից հետո ժամանակն է, որ Ադրբեջանն ու Հայաստանը խաղաղության համաձայնագիր ստորագրեն, սա է մեր մտադրությունը։ Մենք հայկական կողմին ներկայացրել ենք 5 հիմնական սկզբունքներից բաղկացած մեր առաջարկները. Հուսով եմ, որ Հայաստանը նույնպես քաղաքական կամք կցուցաբերի և խաղաղության պայմանագիր կկնքի Ադրբեջանի հետ՝ միջազգային հանրության կողմից ճանաչված այս հիմնական սկզբունքների հիման վրա։ Եթե դա տեղի ունենա, ապա Հարավային Կովկասում խաղաղություն կգա, ինչպես նաև համագործակցության հնարավորություններ կառաջանան։ Այսօր մտքեր ենք փոխանակել նաև Վրաստան-Ադրբեջան-Հայաստան խորհրդակցությունների մեկնարկի շուրջ։ Եթե հայկական կողմը պատրաստ է սրան, մենք էլ ենք պատրաստ»:
168.am-ի հետ զրույցում վրացի վերլուծաբան Իրակլի Մենաղարիշվիլին ասաց, որ պատահական չէ, որ հայ-վրացական շփումներում խոսվում է Սոչիի եռակողմ բանակցությունների արդյունքների մասին:
Նախ, նրա որակմամբ, Հարավային Կովկասում անվտանգության հարցը Հայաստանի, Վրաստանի ու Ադրբեջանի գլխավոր շահն է, ուստի Վրաստանն այն առաջին երկրներից մեկն է, որը մշտապես պետք է ներգրավված լիներ ու դերակատարություն ունենար հակամարտության գոտում իրավիճակը մեղմելու գործում:
«Ինչ-ինչ պատճառներից ելնելով, այդ հարցը մշտապես քննարկվել է, Վրաստանն առաջարկել է կամուրջ լինել, քննարկումների վայր լինել Հայաստանի ու Ադրբեջանի միջև, քաղաքացիական հասարակությունների մակարդակով Վրաստանը բազմաթիվ հանդիպումներ ու քննարկումներ է հյուրընկալել, սակայն բարձրաստիճան նախաձեռնություններ չեն եղել: Առաջինը Արարատ Միրզոյանի ու Ջեյհուն Բայրամովի հանդիպումն էր Վրաստանում, սակայն, կարծում եմ, Վրաստանում մտածում են, որ դա պետք է շարունակական լինի:
Ադրբեջանից ևս դեմ չեն կարծես, եթե Հայաստանը արդյունքներ է ներկայացնում, նշանակում է՝ Հայաստանը ևս գործընթացում է, և կան բոլոր հիմքերը, որ տարածաշրջանային մեխանիզմ գործարկվի, որը կքննարկի՝ ինչպես քաղաքական տարաձայնություններ, այնպես էլ՝ ապագա պրոյեկտներ: Նախկինում կար ԵԱՀԿ Մինսկի խումբը, որի գործունեությունը և դրան չմիջամտելը կարմիր գիծ էր բոլոր երկրների համար, հիմա այդ մեխանիզմը փլվել է, և երկրներն իրենց առանձին ջանքերն են ներդնում: Արևմուտքն իր հերթին՝ խթանում է Վրաստանի այս դերակատարությունը, պատահական չէ, որ ամերիկյան մի շարք նախաձեռնություններ իրականացվում են Վրաստանի միջոցով, այդ թվում՝ պատերազմից հետո:
Ռեգիոնալ այս գիծը շարունակվում է, Վրաստանին ձեռնտու է, որ Արևմուտքը մեծացնի իր ներկայությունը Հարավային Կովկասում, որպեսզի Վրաստանին հեշտ լինի դիմակայել 3+3 կոչվող պրոյեկտի ու դրանում շահագրգիռ ուժերի ջանքերին: Վրաստանը դրան միանշանակ դեմ է ՌԴ մասնակցության պատճառով»,- ասաց նա:
