Վերին Շորժայում և Նորաբակում իրավիճակը նորմալ է. Վարչական շրջանի ղեկավարներ

Սեպտեմբերի 28-ին ՊՆ-ի տարածած հաղորդագրության համաձայն, ժամը 18:00-ից սկսած, Ադրբեջանի ԶՈւ ստորաբաժանումները, ականանետերի և խոշոր տրամաչափի հրաձգային զինատեսակների կիրառմամբ, կրակ են բացել հայ-ադրբեջանական սահմանի արևելյան ուղղությամբ տեղակայված մարտական դիրքերի ուղղությամբ։

Ադրբեջանի հարձակման հետևանքով հայկական կողմն ունի 3 զոհ, վիրավորների թվի մասին այս պահին պաշտոնական հաղորդագրություն չկա։

168.am հետ զրույցում Գեղարքունիքի մարզի Վերին Շորժա համայնքի վարչական ղեկավար Արտյոմ Երանոսյանն ասաց, որ իրավիճակը գյուղում հանգիստ է։

«Ոչ երեկ, ոչ այսօր գյուղի ուղղությամբ կրակոցներ չեն եղել, իրավիճակը դեռ հանգիստ է»,- եզրափակեց Արտյոմ Երանոսյանը։

Կարդացեք նաև

Նորաբակի  վարչական ղեկավար Վազգեն Ասատրյանը  փոխանցեց, որ իրավիճակը գյուղում նույնպես հանգիստ է։

«Դեռ նորություն չկա, սովորական»,- կեսկատակ-կեսլուրջ ասաց Նորաբակի վարչական ղեկավարը։

Ինչ վերաբերում է Նիկոլ Փաշինյանի թվիթերյան գրառմանը, որտեղ նա նշել էր, որ ադրբեջանական զորքերի դուրսբերումը և միջազգային դիտորդական առաքելության տեղակայումն ադրբեջանական օկուպացիայից տուժած հայկական տարածքներում և սահմանամերձ տարածքներում բացարձակ անհրաժեշտություն է, Նորաբակի գյուղապետը նկատեց.

«Ես ոչ մի ձև չեմ պատկերացնում՝ ինչպես է լինելու, չգիտեմ։ Եթե իսկապես միջազգային դիտորդական առաքելություն կգա, թող գան, հետո կտեսնենք»։

Տեսանյութեր

Լրահոս