Մարդը պառլամենտի ամբիոնից հեգնում է բանակին, ԱԱԾ մարդկանց է շպիոններ անվանում, իսկ նրանք իրեն են պաշտպանում. Միքայել արքեպիսկոպոս Աջապահյան
Հայաստանի դեմ սանձազերծված հերթական ագրեսիային, ներքին ու արտաքին սրված մարտահրավերներին դիմակայելու գործում հանրային ու քաղաքական տարբեր շրջանակներ կարևորում են ազգային ուժերի՝ զինվորականների, հոգևորականների, պետական ու հասարակական գործիչների միավորումը:
Ո՞րը պետք է լինի հոգևորականության առաքելությունն այսօր՝ 168.am-ի հարցադրմանն ի պատասխան՝ Շիրակի թեմի հոգևոր առաջնորդ Գերաշնորհ Տեր Միքայել արքեպիսկոպոս Աջապահյանը նշեց, որ այդ առաքելությունը միշտ նույնն է՝ խոսք ասել ժողովրդին:
«Մենք խոսքն ասում ենք: Ուրիշ հարց է՝ լսող կա՞, թե՞ չկա. դա մյուս կողմն է: Մենք այս հարցում չենք թերացել, կարծում եմ, և ի սկզբանե հայտարարել ենք, որ այս իշխանությունը չարիք է, առաջարկել ենք ուղիներ այս չարիքից ազատվելու, շարունակում ենք նույնը. դրանից ավել ի՞նչ պիտի անենք:
Ես ասել եմ, որ այս իշխանությունը պետք է հեռանա, և ուժային կառույցներն իրենք պատասխանատու են այս մարդուն հեռացնելու գործում, իրենք պիտի հեռացնեն այս մարդուն: Չեն հեռացնում. երևի իրենց ձեռք է տալիս, և սա խոսում է բանակի, ԱԱԾ անճարության մասին: Մարդը պառլամենտի ամբիոնից հեգնում է բանակին, ԱԱԾ մարդկանց է շպիոններ անվանում, իսկ նրանք ենթարկվում են և իրեն են պաշտպանում: Էս աբսուրդի մեջ ի՞նչ կարող է անել եկեղեցին»,- նշեց նա:
Հոգևորականը համոզված է՝ եթե եկեղեցին լիներ ուժային կառույց, հարցը վաղուց լուծված կլիներ:
Անդրադառնալով ինքնաբուխ հերթական հավաքի շարունակականությանն ու նպատակներին՝ նա ասաց. «Աստված տա՝ ունենա շարունակություն. կարևոր և միակ պայմանն այսօր այս չարիքի իշխանությունից ձերբազատվելն է, այս հակաազգային իշխանությունից ազատվելն է: Ուրիշ ճանապարհ չկա:
Բայց այնպես չէ, որ եկողին հեշտ է լինելու, այնպիսի փոսի մեջ ենք, որ եկողին բացարձակապես չեմ կարող նախանձել. եկողը պետք է նահատակվի, որպեսզի երկիրը հանի այս փոսից»:
Հիշեցնենք, որ երեկ Ազգային ժողովում վարչապետ Նիկոլ Փաշինյանի աղմկահարույց հայտարարություններից հետո Երևանում, Ստեփանակերտում և Գյումրիում նրա հրաժարականի պահանջով ինքնաբուխ հանրահավաքներ մեկնարկեցին:
«Ես ինձ վրա վերցրել եմ պատասխանատվություն՝ գնալ ծանր որոշումների՝ հանուն խաղաղության, բայց ծանր որոշումներ չի նշանակում՝ ՀՀ պետական շահերին հակասող որոշումներ: Մենք այդ որոշումներին պիտի գնանք՝ երաշխավորելու համար ՀՀ անվտանգությունը, տևական կայունությունը, խաղաղությունը. մենք չենք կարող այսօր վերնագրերի ներքո գրենք՝ «խաղաղության պայմանագիր», տակը ստորագրենք, որի արդյունքում 6 ամիս անց նոր պատերազմ կսկսվի: Մենք ուզում ենք ստորագրել մի թուղթ, որի արդյունքում մեզ լիքը մարդ կքննադատի, կհայհոյի, դավաճան կասի, նույնիսկ կարող է ժողովուրդը որոշի մեզ իշխանությունից հեռացնել, էլի գոհ, շնորհակալ կլինենք, եթե դրա արդյունքում ՀՀ-ն՝ 29.800 քկմ տարածքով, ստանա տևական խաղաղություն և անվտանգություն:
Ես շատ հստակ ասում եմ՝ այն որոշումը, որ սա ապահովելու է, ես այդ որոշումը ստորագրելու եմ. ինձ չի հետաքրքրում՝ ինչ կլինի հետո ինձ հետ, ինձ հետաքրքրում է՝ ինչ կլինի հետո ՀՀ-ի հետ»,- հայտարարել էր Նիկոլ Փաշինյանը:
