«Իրականությանը չի համապատասխանում, գյուղի ուղղությամբ կրակոցներ չեն հնչել». Շոշի գյուղապետ
Հուլիսի 20-ին ադրբեջանական կողմը տեսանյութեր տարածեց, թե արցախցիներին, այսպես ասած՝ «պատժելու գործընթացը» շարունակվում է, և այդ համատեքստում հրապարակված տեսանյութով ցույց էին տալիս, որ կրակել են Ասկերանի շրջանի Շոշ գյուղի ուղղությամբ։
168.am–ի հետ զրույցում Շոշ գյուղի ղեկավար Էրիկ Աբրահամյանը հերքեց ադրբեջանցիների տարածած տեղեկությունը:
«Այդ ամենն իրականությանը չի համապատասխանում, գյուղի ուղղությամբ կրակոցներ չեն հնչել։ Նման բան չի եղել»,- ասաց Էրիկ Աբրահամյանը։
Նշենք, որ քարոզչական նպատակով թշնամին օգտագործում է հնարավոր և անհնարին գրեթե բոլոր միջոցները՝ արցախցիներին ցույց տալու, որ ցանկացած պահի կարող է նրանց ուղղությամբ կրակել և զրկել կյանքից։ Նույն նպատակով գարնան սկզբին Ադրբեջանի զինված ուժերի ներկայացուցիչները բարձրախոսներով Արցախի տարբեր գյուղերում հայտարարում էին և կոչ անում բնակիչներին լքել իրենց գյուղերը, հակառակ դեպքում նրանց կսպանեն։
Ի դեպ, Շոշն Արցախի այն գյուղերից է, որը չնայած մեծ վնասներ էր կրել 44-օրյա պատերազմի ժամանակ, սակայն պատերազմից հետո կարողացավ արագ վերադառնալ կյանքի բնականոն հուն, վերանորոգել ավերված տները և շարունակել ապրել, ավելին՝ գյուղը կարողացավ իր հարկի տակ ընդունել թշնամու կողմից օկուպացված տարածքներից տեղահանված մի խումբ արցախցիների։
