Եթե մարդիկ ցանկանում են մեկ գավաթ գինով շնորհավորել հարսանյաց իրադարձությունը, կնունքը, ասել՝ ո՞չ. ԿԳՄՍ նախարարը՝ հուշարձանների տարածքում իրականացվող միջոցառումների մասին
ՀՀ ԿԳՄՍ նախարարություն «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ը խստացնելու է հուշարձանների տարածքում իրականացվող միջոցառումների կազմակերպման պահանջները։ Այս մասին օրերս ՊՈԱԿ-ը հանդես էր եկել հայտարարությամբ:
Խնդիրն այն է, որ մի քանի օր առաջ «Զվարթնոց» պատմամշակութային արգելոց-թանգարանում հանրային միջոցառում էր տեղի ունեցել, որի ընթացքում եղել էր նախապես համաձայնեցված երաժշտության ժանրի և երգացանկի խախտում, արդյունքում՝ արգելոց-թանգարանում հնչել էին ռաբիս ոճի երգեր։
«Միջոցառումը տեղի է ունեցել արգելոցի տարածքում և ոչ աշխատանքային ժամերին։ Խստորեն պահպանվել են հուշարձանի օգտագործման պայմանները։ Հրավառությունը, պահպանելով անվտանգության կանոնները, կազմակերպվել է արգելոցի տարածքում՝ հուշարձանից անհրաժեշտ հեռավորությամբ։
Միջոցառման ընթացքում եղել է նախապես համաձայնեցված երաժշտության ժանրի և երգացանկի խախտում, ինչը մասնաճյուղի ղեկավարության միջամտության արդյունքում շտկվել է»,- ասվում է ՊՈԱԿ-ի տարածած հայտարարության մեջ:
ՀՀ կրթության, գիտության, մշակույթի և սպորտի նախարար Վահրամ Դումանյանից Ֆրանսիայի դեսպանատանը լրագրողները հետաքրքրվել են, թե ինչպե՞ս է տեսնում այդ հարցի լուծումը, երբ ամեն ոք կարող է մեկ ժամվա համար վճարել 500.000 դրամ ու քեֆ անել «Զվարթնոց» պատմամշակութային արգելոց-թանգարանում։
«Եթե հիշում եք՝ որոշ ժամանակ առաջ Գառնու տաճարում եղավ խնդիր, հիմա էլ՝ «Զվարթնոցում»: Մենք՝ որպես լիազոր մարմին, ՊՈԱԿ-ը, ում միջոցով դա արվում է, բոլորն օրինապաշտ արել են իրենց պարտականությունները: Այսինքն՝ դիմողը դիմել է, ՊՈԱԿ-ը սահմանված կարգով դիմել է լիազոր մարմնին, կարգի շրջանակում լիազոր մարմինը չի առարկել միջոցառման անցկացումը:
Միջոցառման ընթացքում, ըստ իմ տեղեկությունների՝ եղել են որոշակի շեղումներ այն կարգից, որին բոլորը տվել են համաձայնություն»,- ասաց նախարարը՝ ընդգծելով, որ դրանք հուշարձաններ են, հանրային արժեք են, մեր ժողովրդինն են ու եթե «մարդկանցից մեկն ամուսնանում է, մեկը կնքվում է և ցանկություն ունի այդ հուշարձանային տարածքում, սրբավայրում նկարվել, նշել», ապա, իր կարծիքով՝ արգելք դնել չարժե, բայց՝ մի կարևոր պահանջով. այդ տարածքը չպետք է վերածվի կերուխումի, երկարատև կենացների, տարբեր ճաշատեսակների մատուցման և ազատ ոճի երաժշտության վայրի:
«Երկար ժամանակով տարածք տրամադրելը, կարծում եմ, այդքան նպատակահարմար չէ: Կարճ ասած՝ ռեստորանի չվերածվի: Բայց, եթե մարդիկ ցանկանում են մեկ գավաթ գինով շնորհավորել հարսանյաց իրադարձությունը, կնունքը, ասել՝ ո՞չ: Իհարկե, այդ ողջ ընթացքում ցանկացած քաղաքացի, ով ուզում է մտնել և զբոսնել հուշարձանի տարածքում, մուտքը պետք է լինի ազատ»,- հավելեց Վահրամ Դումանյանը:
