Անդրանիկ Քոչարյանը Սուրեն Պապիկյանին «պաշտպանեց» լրագրողների հարցերից
Այսօր Պաշտպանության նախարար Սուրեն Պապիկյանը ԱԺ պաշտպանության և անվտանգության հարցերի մշտական հանձնաժողովի արտահերթ նիստում ներկայացրեց «Պաշտպանության մասին» օրենքի նոր նախագիծը։
Հանձնաժողովի նիստից հետո լրագրողները փորձեցին մի քանի հարց ուղղել Սուրեն Պապիկյանին, սակայն ՔՊ-ական պատգամավոր, հանձնաժողովի նախագահ Անդրանիկ Քոչարյանը սկսեց նախարարին «պաշտպանել» լրագրողների հարցերից, ու Սուրեն Պապիկյանի փոխարեն ինքը խոսեց։
«Հարգելի գործընկերներ, ժամանակը սուղ է, պարոն նախարարն ամբողջ օրն այստեղ է, կխոսեք»,- ասաց Անդրանիկ Քոչարյանը։
Սուրեն Պապիկյանը նախ լրագրողներից ներողություն խնդրեց, որ հարցերին այդ պահին չի կարող պատասխանել, այնուհետև ավելացրեց, որ օրենքի նախագիծը պետք է ներկայացնի նիստերի դահլիճում, դրանից հետո լրագրողների հետ կխոսի։
Նշենք, որ Անդրանիկ Քոչարյանը սովորաբար ԱԺ-ում Պաշտպանության նախարարին, փոխնախարարներին մշտապես «պաշտպանել» է լրագրողների հարցերից և անմիջապես տարել իր աշխատասենյակ։
Այդպես է եղել նաև նախկին նախարար Վաղարշակ Հարությունյանի և Արշակ Կարապետյանի դեպքում։
