Հոսանքազրկված է նաև Նոր Կյանք համայնքի թիվ 13/13 ընտրատեղամասը

Վեդի խոշորացված համայքնի տեղական ինքնակառավարման մարմինների ընտրություններն առավոտից արդեն որոշ տեղամասերում անցնում են լարված մթնոլորտում: Դրան գումարվում են նաև հավելյալ տեխնիկական խնդիրները, որոնք պատահականության արդյունք են, թե միտում՝ կպարզենք առաջիկայում:

Մեկը մյուսի հետևից հոսանքազրկվում են ընտրատեղամասերը: Որոշ ժամանակ առաջ 13/17 ընտրատեղամասի աշխատանքն էր կաթվածահար եղել հոսանքազրկման պատճառով, թեպետ հանձնաժողովի նախագահը վստահեցրել էր, որ դեռ որոշակի ժամանակ մատնահետքերը ֆիքսող սարքը կարող է աշխատել, և ընտրական պրոցեսը չէր դադարեցվել:

Այս պահին հոսանք չկա նաև Արարատի նախկին մարզպետ, Նիկոլ Փաշինյանի սանիկ ու մտերիմ, «Քաղաքացիական պայմանագիր» կուսակցության ավագանու ցուցակը գլխավորող Գարիկ Սարգսյանի գյուղի՝ Նոր Կյանք համայնքի թիվ  13/13 ընտրատեղամասում: Համայնքապետ Արտաշյանը 168.am-ի թղթակցին ասել է՝ էլեկտրիկ է մոտենալու, հասկանան խնդիրը:

Հիշեցնենք, որ «Քաղաքացիական պայմանագիր» կուսակցության ավագանու ցուցակը գլխավորում է  ՔՊ-ական, Վեդի համայնքի ղեկավարի պաշտոնակատար Գարիկ Սարգսյանը։ Ավագանու թեկնածուներից միայն 21-ն են անկուսակցական, մյուսները ներկայացնում են ՔՊ-ն։

Իսկ «Իմ հզոր համայնք» կուսակցության ցուցակում ընդգրկված են ավագանու 80 թեկնածուներ․ ցուցակը գլխավորւմ է «Իմ հզոր համայնք» կուսակցության ներկայացուցիչ Սպարտակ Թարթիկյանը։ Ավագանու թեկնածուներից 65-ը նույպես ներկայացնում են «Իմ հզոր համայնքը», 2 թեկնածու ներկայացնում է ՀՀԿ-ն, 1-ը՝ ՀՅԴ-ն, մնացած 11-ն էլ անկուսակցական են։

Հիշեցնենք, որ Վեդիում 2021 թվականի դեկտեմբերի 5-ին անցկացվել էին ՏԻՄ ընտրություններ․ «Իմ հզոր համայնք» կուսակցության օգտին քվեարկել էր 8 666 մարդ, ՔՊ-ի օգտին՝ 7 690 մարդ. «Հանրապետություն» կուսակցության օգտին քվեարկել էր 3 299 ընտրող։ Ընտրություններին մասնակցած որեւէ քաղաքական ուժ չէր կարողացել հաղթահարել եւ հավաքել անցողիկ՝ 50+1% շեմը, ինչը նշանակում է, որ չէր կարող ինքնուրույն համայնքապետի թեկնածուին ընտրել առանց այլ ուժի հետ կոալիցիա կազմելու: Կոալիցիա այդպես էլ չկազմվեց, փոխարենը՝ դեկտեմբերի 16-ին ավագանու «Հանրապետություն» եւ «Քաղաքացիական պայմանագիր» խմբակցությունների անդամները ինքնաբացարկ հայտնեցին եւ հրաժարվեցին մանդատներից,  որից հետո էլ հայտարարվեց  նոր ընտրություններ անցկացնելու մասին։

Քիչ առաջ ընտրատեղամասի հոսանքը միացվեց։