Վարդենիսի մի քանի բնակավայրերում տեղումների եւ բքերի պատճառով տեղ-տեղ ձյան բարձրությունը հասնում է մի քանի մետրի
Գեղարքունիքի մարզի Վարդենիս խոշորացված համայնքի որոշ բնակավայրերում ձյան տեղումների ու բքերի պատճառով մարտի 23-ի առավոտվա դրությամբ դժվարանցանելի են մնում մի շարք սահմանամերձ ու բարձրլեռնային բնակավայրեր տանող ճանապարհները, իսկ Մարտունու, Գավառի, Սեւանի եւ Ճամբարակի տարածաշրջաններում բոլոր ճանապարհները բաց ու անցանելի են տրանսպորտային երթեւեկության համար։
Ինչպես «Արմենպրես»-ին տեղեկացրին Գեղարքունիքի մարզի քաղաքաշինության վարչությունից, Վարդենիս համայնքի մի քանի բնակավայրերում շարունակվող տեղումների եւ բքերի պատճառով տեղ-տեղ ձյան բարձրությունը հասնում է մի քանի մետրի։ Ճանապարհները սպասարկող կազմակերպության կողմից իրականացվում են ճանապարհների մաքրման եւ մշակման աշխատանքներ, սակայն եղանակային պայմանները թույլ չեն տալիս՝ դեպի Կութ, Նորաբակ, Գեղաքար, Ախպրաձոր եւ այլ բնակավայրերում լիակատար անցանելիություն ապահովելու համար։ Աշխատանքներ են տարվում նաեւ Վարդենյաց լեռնանցքում երթեւեկությունը վերականգնելու համար։
Խոսրով Խլղաթյան
