Արցախի ՔԿ–ն տեղեկացնում է ազգային ատելության շարժառիթով կատարված հանցագործությունների դեպքերի առթիվ հարուցված քրեական գործերի մասին
Արցախի Մարտունու շրջանի Թաղավարդ գյուղում տեղակայված ադրբեջանական մարտական դիրքից ազգային ատելության շարժառիթով Կարմիր Շուկայի ուղղությամբ արձակված կրակոցներից վնասվել էր գյուղացիներից մեկի առանձնատունը։ Հարուցված քրեական գործի մասին հաղորդագրություն է տարածել ԱՀ քննչական կոմիտեն։
«ԱՀ քննչական կոմիտեի տարածքային քննչական վարչության Մարտունու շրջանի քննչական բաժնում վարույթ է ընդունվել 2022թ փետրվարի 11-ին և փետրվարի 18-ին ԱՀ Մարտունու շրջանի Թաղավարդ գյուղում տեղակայված ադրբեջանական մարտական դիրքից հանրավտանգ եղանակով, ազգային ատելության շարժառիթով հրաձգային զինատեսակներից Կարմիր Շուկա գյուղի ուղղությամբ արձակված կրակոցներից ԱՀ Մարտունու շրջանի Կարմիր շուկա գյուղի բնակիչներ՝ Արև Գաբրիելյանի և Սերգեյ Գևորգյանին պատկանող առանձնատները վնասելու՝ հանցագործությունը իրենց կամքից անկախ հանգամանքներում ավարտին չհասցնելու դեպքերի առթիվ ԱՀ քրեական օրենսգրքի 33-191-րդ հոդվածի 2-րդ մասի 1-ին և 4-րդ կետերով հարուցված քրեական գործերը:
Քրեական գործերի նախաքննությունը շարունակվում է»,-ասված է հաղորդագրության մեջ:
