Ուռուցքաբանության ազգային կենտրոնը առաջին անգամ Հայաստանում ներդրել է միկրոալիքային աբլյացիայի մեթոդը

ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնը շարունակում է նորագույն բժշկական տեխնոլոգիաների ներդրումը։ Կենտրոնի բժիշկները առաջին անգամ Հայաստանում սկսել են կիրառել փափուկ հյուսվածքների չարորակ գոյացությունների և մետաստազների բուժման գերժամանակակից, քիչ ինվազիվ մեթոդ՝ միկրոալիքային աբլյացիա:

Ինչպես պարզաբանեց ՈւԱԿ-ի Որովայնային և էնդովիրաբուժության բաժանմունքի ընդհանուր վիրաբույժ Ավետիք Պետրոսյանը, ամենից հաճախ այս մեթոդը կիրառվում է լյարդի քաղցկեղի դեպքում, բայց կարող է օգտագործվել ինչպես ոսկրերի, երիկամների, վահանագեղձի, շագանակագեղձի և այլ օրգանների քաղցկեղի բուժման համար, այնպես էլ պալիատիվ ցավազրկման նպատակով։ Միկրոալիքային աբլյացիան կատարվում է բաց, լապարասկոպիկ և միջմաշկային եղանակներով։

Բժշկի խոսքով՝ անշուշտ, ցանկացած չարորակ գոյացության ամենաարդյունավետ մեթոդը վիրաբուժական հեռացումն է, սակայն այն ոչ միշտ է հնարավոր՝ հիվանդության ուշ փուլերի, ուղեկցող հիվանդությունների կամ հիվանդի՝ թույլ լինելու պատճառով։ Մասնավորապես՝ լյարդում ուռուցքի դեպքերի մեծ տոկոսը ոչ վիրահատական է համարվում ուշ հայտնաբերման կամ ուղեկցող ցիրոզի պատճառով։ Այդպիսի հիվանդների համար բուժման հիմնական մեթոդներներն են աբլյացիան և քիմիաէմբոլիզացիան, որոնք շատ հաճախ կիրառվում են միասին։ Աբլյացիան կարելի է կիրառել բուժման և՛ որպես ինքնուրույն, և՛ լյարդի մասնահատման հետ զուգակցված մեթոդ։

Աբլյացիան նաև գերադասելի բուժման մեթոդ է լյարդի բազմակի փոքր ուռուցքների, ինչպես նաև լյարդում՝ այլ տեղակայման քաղցկեղների մետաստազների առկայության դեպքում: Այն գերադասելի է նաև այն դեպքերում, երբ ուռուցքները տեղակայված են մեծ անոթների մոտ:

Երիկամի վաղ փուլի քաղցկեղի դեպքում միջմաշկային միկրոալիքային աբլյացիայի արդյունքները համեմատելի են երիկամի լապարասկոպիկ մասնահատման արդյունքների հետ։ Միջմաշկային միկրոալիքային աբլյացիան կիրառվում է նաև թոքի՝ ոչ վիրահատական քաղցկեղի և մետաստազների բուժման համար։ Ոսկրերի քաղցկեղի բուժման նպատակով միկրոալիքային աբլյացիան կիրառվում է, եթե ճառագայթային բուժումն ինչ-ինչ պատճառներով անհնար է։

Այս մեթոդի ներազդման սկզբունքը նույնն է, ինչ մեզ հայտնի միկրոալիքային վառարաններում․ միկրոալիքային ճառագայթման ազդեցությամբ տեղի է ունենում քաղցկեղային հյուսվածքների տաքացում և մեռուկացում։

Այսպես՝ ուռուցքային օջախի մեջ մտցնում են միկրոալիքներ ճառագայթող անտենա (էլեկտրոդ)։ Այդ ալիքների ազդեցությամբ ջրի մոլեկուլները սկսում են արագ պտտվել՝ առաջացնելով քաղցկեղային հյուսվածքի հավասարաչափ տաքացում, ինչը բերում է դրա քայքայմանը։

Մինչև վերջերս աբլյացիայի հիմնական մեթոդ էր համարվում ռադիոհաճախային եղանակը։ Սակայն վերջին տարիներին միկրոալիքային աբլյացիան մի շարք առավելությունների շնորհիվ ավելի լայն կիրառում ստացավ։ Մասնավորապես՝ ՈւԱԿ-ի ձեռք բերած միկրոալիքային աբլյացիայի Solero համակարգը ճառագայթում է 2.45 գիգահերց տիրույթում և ապահովում է․

• հյուսվածների 150-200 աստիճանի տաքացում,
• 5-6 սմ չափերով նորագոյացության քայքայում ,

• քայքայումը տեղի է ունենում շատ կարճ ժամանակամիջոցում՝ 3-5 րոպե:
Solero համակարգը մի շարք առավելություններ ունի նաև այլ միկրոալիքային համակարգերի հետ համեմատ։ Դա ամենաբարակ էլեկտրոդն է (2 մմ), գերհզոր գեներատորը (140 վատտ), սառեցման արդյունավետ համակարգը և պասիվ էլեկտրոդի անհրաժեշտության բացակայությունը, ինչի շնորհիվ այն համատեղելի է պեյսմեյկերների և այլ սարքերի հետ։

Արդեն ապացուցված է՝ միկրոալիքային աբլյացիայի մեթոդը

• անվտանգ է,
• հեշտ է կիրառման մեջ,
• արդյունավետ է ուռուցքային հիվանդությունների բուժման համար։

Մահվան դեպքերի բացակայությունը, կիրառումից հետո առաջացած բարդությունների փոքր թիվը ապացուցում են այս մեթոդի առավելությունը՝ քաղցկեղի բուժման նմանատիպ ոչ ինվազիվ տեխնոլոգիաների հետ համեմատ։