ԱՄՆ-ը հնարավոր է համարել նոր պատժամիջոցները ՌԴ-ի բանկերի և նավթագազային ոլորտի նկատմամբ
Միացյալ Նահանգները կարող է էլ ավելի ընդլայնել Ռուսաստանի նկատմամբ պատժամիջոցները: Այդ մասին Սպիտակ տան Ազգային տնտեսական խորհրդի փոխտնօրեն Դալիփ Սինգհը հայտարարել է CBS News-ին տված հարցազրույցում:
«Մենք կարող ենք ընդլայնել մեր պատժամիջոցները: Ձեռնարկել միջոցներ, ընդունել պատժամիջոցներ, դրանք կիրառել ավելի մեծ թվով բանկերի, ավելի շատ սեկտորների նկատմամբ»,-ասել է Սինգհը: Նրա խոսքով՝ պատժամիջոցները կարող են վերաբերել Ռուսաստանի տնտեսության՝ ռազմավարական տեսակետից կարեւոր ուղղություններին»:
«Դա հիմնականում վերաբերում է նավթին ու գազին, բայց կան նաեւ այլ հատվածներ»,-նշել է նա: Խոսելով Ռուսաստանի նկատմամբ պատժամիջոցների հնարավոր չեղարկման մասին՝ Սինգհն ընդգծել է, որ «մենք դեռ չենք էլ մոտեցել այդ կետին»:
Նա կարծում է, որ առաջինը, ինչն անհրաժեշտ է դա անելու համար, Ուկրաինայում ռազմական գործողությունը դադարեցնելն է, իսկ դա տեղի չի ունենում: Ավելի վաղ ԱՄՆ-ն արդեն պատժամիջոցներ սահմանել էր ռուսաստանյան մի շարք բանկերի նկատմամբ եւ Ռուսաստանից էներգակիրներ ներմուծելուց հրաժարվել Ուկրաինայում ՌԴ ռազմական գործողության պատճառով ձեռնարկված միջոցների շրջանակներում, հաղորդել է «Ինտերֆաքս»-ը:
