Տղամարդը ոգելից խմիչքի ազդեցության տակ ծեծել էր հորեղբորը, որն էլ գլխի վնասվածքների հետևանքով մահացել էր

Մարտի 5-ին ոստիկանները Գյումրի քաղաքի Մելիք-Սարգսյան փողոցի տներից մեկում 63-ամյա տանտիրոջը մահացած գտան: Դին հյուրասենյակում էր: Տղամարդու գլխին քերծվածքներ ու արնանման հետքեր կային: Կատարվածի մասին տեղացիները չէին ահազանգել: Դեպքի վերաբերյալ հաղորդումը ոստիկանության Կումայրիի բաժնում ստացվել էր արտերկրից: Մահացածի եղբայրն էր ահազանգել ու խնդրել, որ Մելիք-Սարգսյան փողոց ոստիկաններ մոտենան:

Դեպքի առթիվ հարուցվեց քրեական գործ: Նշանակվեց դատաբժշկական փորձաքննություն:

Ոստիկանության Շիրակի մարզային վարչության, Կումայրիի և Մուշի բաժինների ծառայողների համատեղ ձեռնարկած միջոցառումների արդյունքում, ինչպես և նախաքննությամբ ձեռք բերված բավարար ապացույցների համակցությամբ հիմնավորվեց, որ հանցագործությունը կատարել է մահացածի եղբորորդին, որը նույն փողոցի բնակիչ էր՝ 38 տարեկան։
Կասկածվողը հայտնաբերվել ու բերման է ենթարկվել ոստիկանության Կումայրիի բաժին:

Պարզվել է՝ մարտի 4-ին, ժամը 22-ի սահմաններում, նա ոգելից խմիչքի ազդեցության տակ ծեծել էր հորեղբորը, որն էլ գլխի վնասվածքների հետևանքով մահացել էր:

38-ամյա տղամարդը տվել է խոստովանական ցուցմունք, ձերբակալվել, ապա կալանավորվել է:

Հանգամանքները պարզվում են։

Հարուցված քրեական գործի նախաքննությունը շարունակվում է։