Արաբական պետությունների լիգան դիվանագիտությունը համարել է ուկրաինական ճգնաժամի միակ ելքը
Արաբական պետությունների լիգան (ԱՊԼ) հավատարիմ է մնում երկրների ինքնիշխանության եւ անկախության պահպանման սկզբունքին՝ համարելով որ Ուկրաինայում ճգնաժամից միակ ելքը կլինի դիվանագիտական լուծումը: Այդ մասին ասված է տարածաշրջանային հանրակցության արտաքին գործերի նախարարությունների ղեկավարների մակարդակով Կահիրեում կայացած 157-րդ նստաշրջանի արդյունքներով՝ մարտի 9-ի երեկոյան հրապարակված հայտարարության մեջ:
«Վերստին հավաստում ենք արաբական երկրների կողմնակցությունը միջազգային իրավունքի եւ ՄԱԿ-ի Կանոնադրության սկզբունքներին, որոնք հիմնված են պետությունների ինքնիշխանության, անկախության եւ տարածքային ամբողջականության պահպանման վրա,- նշված է այնտեղ:- Մատնանշում ենք շուտափույթ դիվանագիտական լուծման հասնելու աշխատանքի անհրաժեշտությունը, որն ԱԳՆ-ների Խորհուրդը համարում է այդ ճգնաժամից միակ ելքը, ինչը կօգնի պահպանելու միանգամայն անմեղ մարդկանց կյանքը եւ թույլ չտալու առանց այն էլ ողբերգական հումանիտար իրավիճակի վատթարացում»:
Անցյալ օրը հանդես գալով Խորհրդի նիստում՝ ԱՊԼ-ի գլխավոր քարտուղար Ահմեդ Աբու ալ Գեյթը նախազգուշացրել է, որ ուկրաինական ճգնաժամն արաբական տարածաշրջանին սպառնում է լուրջ տնտեսական հետեւանքներով, այդ թվում պարենային անվտանգության առումով, ինչը պահանջում է «լավ կշռադատված գործողություններ», որոնք նվազագույնի հասցնեն հնարավոր վնասը:
Նա նաեւ կարծում է, որ արաբական երկրները տեղի ունեցող իրադարձությունների նկատմամբ իրենց դիրքորոշումներում պետք է առաջնորդվեն «ազգային, մասնավորապես, ամբողջությամբ վերցված համաարաբական շահերով», հաղորդել է ՏԱՍՍ-ը:
