Սնոուբորդը կարող է նոր մշակույթ ձևավորել մարզասերների մոտ. Գագիկ Սարգսյան
Հայաստանի սնոուբորդի անդրանիկ առաջնությունը կարող է նոր մշակույթ ձևավորել օլիմպիական այս մարզաձևի համար: «Արմենպրես»-ի հետ զրույցում նման կարծիք հայտնեց Հայաստանի դահուկասպորտի ֆեդերացիայի նախագահ Գագիկ Սարգսյանը:
«Տարածվածության առումով, սիրողական մակարդակում սնոուբորդը շատ սիրված է Հայաստանում, բայց ունենք նաև պրոֆեսիոնալներ: Սնոուբորդն օլիմպիական մարզաձև է և համարվում է դահուկասպորտի ֆեդերացիայի մարզաձևերից մեկը: Առաջին առաջնությունից հետո հստակ պատկեր կունենանք մեր ունեցած ներուժի առումով»,-ասաց Սարգսյանը:
Վերջինս շեշտեց, որ ֆեդերացիան լուրջ փորձ ունի մարզաձևերի զարգացման առումով` հաշվի առնելով դահուկավազքը և լեռնադահուկը: Այս փորձի հաշվին ֆեդերացիան կկարողանա Հայաստանում առավել արագ զարգացնել սնոուբորդը:
«Սնոուբորդը կարող է նոր մշակույթ ձևավորել մարզասերների մոտ, քանի որ այն դասական սպորտային մարզաձևերից չէ: Փորձելու ենք փոքր տարիքից հիմք դնել մարզիկների մոտ »,-ասաց ֆեդերացիայի նախագահը:
