20 միլիոն դրամ հարկը չվճարած ընկերությանը Կառավարությունը 1.5 միլիարդ դրամի  արտոնություն է տվել

Կառավարությունը  մարտի 3-ի նիստում մաքսատուրքից ազատվելու արտոնություն է տվել «Ոսկե պինգվին» ՍՊԸ-ին, որը մինչև այժմ զբաղվում էր պաղպաղակի արտադրությամբ, հիմա կզբաղվի նաև կարագի արտադրությամբ։

Ծրագրի շրջանակում նախատեսվում է իրականացնել 9.9 մլրդ դրամի ներդրում հումքի ձեռքբերման համար։

Նախատեսվում է ստեղծել 30 նոր աշխատատեղ` մինչև 200,000 դրամ միջին աշխատավարձով։

Արտոնություն ստանալու համար ներկայացված ապրանքների արժեքը կազմում է 9.9 մլրդ դրամ:

Մաքսատուրքից ազատման արտոնությունը գնահատվում է 1.5 մլրդ դրամ:

Ուշագրավ է, որ 1.5 միլիարդ դրամի արտոնություն է ստացել մի ընկերություն, որը 2020 թվականի դեկտեմբերին, ըստ ՀՀ ՊԵԿ տվյալների, ունեցել է չմարված հարկային պարտավորություններ 20 միլիոն 588 հազար դրամի չափով, ինչի առնչությամբ ՊԵԿ-ում հարուցվել է վարչական վարույթ։

Վարույթի մասին հարկ վճարողը պատշաճ կերպով ծանուցվել է, սակայն չի ներկայացել վարույթի նյութերին ծանոթանալու համար և որևէ բացատրություն չի տվել։

Արդյունքում ՊԵԿ-ում որոշում է կայացվել չվճարված հարկերը գանձել Հարկադիր ծառայության միջոցով։