Մոսկվա է վերադարձել մասնագետների առաջին խումբը, որը հետ է կանչվել Կուրուի տիեզերակայանից
Մասնագետների առաջին խումբը, որը հետ է կանչվել Կուրուի տիեզերակայանից, վերադարձել է Մոսկվա: Այդ մասին հայտնել է «Ռոսկոսմոս»-ի գլխավոր տնօրեն Դմիտրի Ռոգոզինը։ «Գվիանայի տիեզերական կենտրոնից (ԳՏԿ) Մոսկվա է վերադարձել ռուսաստանցի մեկնարկի մասնագետների եւ հրթիռաձիգների առաջին խումբը, որը բաղկացած է 29 մարդուց»,-Ռոգոզինը գրել է իր Telegram-ալիքում:
«Ռոսկոսմոս»-ի գլխավոր տնօրենի խոսքով՝ մնացած 56 հոգին Կուրուից ինքնաթիռով կժամանեն առաջիկայում: Ավելի վաղ Ռոգոզինը հայտարարել էր, որ պետական կորպորացիան, ի պատասխան ԵՄ-ի պատժամիջոցների, դադարեցնում է համագործակցությունը ֆրանսիական Գվիանայում Կուրուի տիեզերակայանի եվրոպացի գործընկերների հետ եւ հետ է կանչում իր տեխնիկական անձնակազմին:
ԵՄ-ն խիստ ֆինանսական ու տեխնոլոգիական սեկտորալ սահմանափակումներ է մտցրել ՌԴ-ի 64 հանգուցային կառույցների դեմ, այդ թվում՝ «Պրոգրես» հրթիռա-տիեզերական կենտրոնի նկատմամբ, եւ լրջորեն սահմանափակել է այդ կառույցների մուտքի հնարավորությունը կապիտալի շուկա եւ արգելել տեխնիկական օգնության տրամադրումը նրանց եւ նրանց հետ ապրանքների, ռազմական կամ կրկնակի նշանակության տեխնոլոգիաների, ինչպես նաեւ բեւեռային լայնություններում ու առափնյա ծանծաղուտներում նավթի արդյունահանման տեխնոլոգիաների եւ սարքավորումների առեւտուրը:
Նաեւ ԵՄ-ն հաստատել է բարձրատեխնոլոգիական արտադրանքի, մասնավորապես, կապի համակարգերի, էլեկտրոնիկայի, կիսահաղորդիչների, ավիացիոն եւ տիեզերական բաղադրիչների ընդլայնված ցուցակ, որոնք արգելվել են Ռուսաստան մատակարարումների համար, հաղորդել է ՏԱՍՍ-ը:
