Առավոտից երեկո անտանելի աղմուկ ու դղրդոց է. «Ֆիզգորոդոկ»-ի բնակիչներն ահազանգում են
«Ֆիզգորոդոկ» անունով հայտնի բնակելի թաղամասի բնակիչներն ահազանգում են. արդեն երկու ամսից ավելի է՝ շաբաթը 6 օր, առավոտից երեկո անտանելի աղմուկի ու դղրդոցի մեջ են ապրում։ Իրենց շարքերում կան ծերեր, գիտությամբ զբաղվողներ, որոնց կյանքն անտանելի է դարձել:
«Քաղաքապետարանը փոխանակ արձագանքի աղմուկի մասին ահազանգերին, ստուգի նորմերը, մտահոգվի հարակից շենքերի բնակիչների, հատկապես՝ տարեցների առողջությամբ, կառուցապատողին թույլատրել է շաբաթը 6 օր մինչև 20:00-ն ծանր տեխնիկայով շինարարություն անել: Պահանջում ենք անհապաղ վերանայել գործող պայմանագիրը և հարգել մարդկանց հանգստի իրավունքը»,- 168.am-ի հետ զրույցում ասացին բնակիչները։
Նրանք նշեցին, որ սպասում են Երևանի քաղաքապետ Հրաչյա Սարգսյանի թաղամաս այցին, քանի որ խոստացել էր:
Բնակիչները նշում են, որ ՀՀ Հողային օրենսգրքի 60 հոդվածի համաձայն՝ գիտական հաստատությանը ծառայող և հանրային նշանակության, ինչպես նաև՝ ջրագծեր պարունակող հողատարածքը ենթակա չէ ֆիզիկական կամ իրավաբանական անձանց կողմից սեփականաշնորհման: Համաձայն գլխավոր հատակագծի՝ հողատարածքը հանդիսացել է Երևանի Ֆիզիկայի ինստիտուտի գիտավանի սպորտային հրապարակը, այստեղով անցնում է ջրագիծ, որը վերջերս վնասվել է շինարարական աշխատանքներից:
Նորահայտ հուշարձան հայտարարված թաղամասի սահմաններն ապօրինաբար փոփոխվել են՝ դուրս թողնելով կառուցապատման համար տրամադրված հողատարածքը և վտանգելով ողջ հուշարձանի ամբողջականությունը: Ի հեճուկս քաղաքապետարանի ներկայացրած պայմանի, ըստ որի՝ կառուցապատողը հայտարարել էր, թե կպահպանի տարածքի կանաչ գոտին, հատվել են տասնյակ բազմամյա ծառեր:
Բնակիչների ձեռքում է հայտնվել կառուցապատող ընկերությանը քաղաքապետարանի կողմից տրված գրավոր թույլտվությունը, որով ընկերությունը դեպի բակ գնացող ճանապարհներից մեկը ժամանակավորապես փակելու թույլտվություն էր ստացել։ Բնակիչները վստահ են՝ փաստաթղթում ամսաթվային անճշտություններ կան։
