Նիկոլ Փաշինյանի ԱԺ-ում գտնվելու ընթացքում անցակետում գրանցում էին լրագրողների նոութբուքերը
ԱԺ հանձնաժողովների համատեղ նիստում քննարկվում է 2022 թվականի պետական բյուջեի նախագիծը: Նիստին մասնակցում էր նաև Նիկոլ Փաշինյանը, որը ավելի քան 30 րոպե անց լքեց քննարկման սենյակը:
Ինչպես միշտ, այսօր ևս ԱԺ-ում սահմանված էր անվտանգության պահպանման խիստ ռեժիմ, նույնիսկ լրագրողներին անվտանգության աշխատակիցները թույլ չէին տալիս պայուսակով մտնել այն սենյակի նախասրահը, որտեղ ընթանում է քննարկումը: Ավելին՝ ԱԺ շենք մուտք գործելիս գրանցում էին նաև լրագրողների նոութբուքերի մակնիշը՝ լրագրողի անուն-ազգանունով:
Հարցին՝ նախկինում նման բան չի եղել, ինչո՞ւ են այսօր ստուգում, անվտանգության աշխատակիցը պատասխանեց, թե միշտ էլ գրանցել են:
Նշենք, որ նախկինում ԱԺ անցակետում երբեք լրագրողի աշխատանքային նոութբուքի մակնիշը չեն գրանցել:
Նշենք մեկ այլ հետաքրքիր հանգամանք ևս, քանի դեռ Նիկոլ Փաշինյանը մասնակցում էր քննարկմանը, սենյակում գրեթե ազատ տեղ չկար, նրա գնալուց անմիջապես հետո պատգամավորներն էլ լքեցին սենյակը: Եվ բյուջեի նախագիծը շարունակեցին քննարկել կիսադատարկ սրահում:
