Պեսկովը հակադարձել է Էրդողանին
Ռուսաստանը ՄԱԿ-ի Անվտանգության խորհրդի նվիրյալ անդամ է և հավատարիմ է ՄԱԿ-ի կանոնադրությանը։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով Թուրքիայի նախագահ Ռեջեփ Թայիբ Էրդողանի այն խոսքերը, որ աշխարհի ճակատագրերը չպետք է որոշեն Երկրորդ աշխարհամարտում «մի խումբ հաղթողներ»։
ИА Новости-ի փոխանցմամբ՝ Պեսկովը նաև հիշեցրել է, որ Վլադիմիր Պուտինն օրերս ՄԱԿ-ի ԱԽ անդամ 5 երկրներին կոչ է արել միավորվել՝ մարդկության դեմ կանգնած մարտահրավերները քննարկելու համար։
Հիշեցնենք, որ հոկտեմբերի 17-ին Թուրքիայի նախագահ Ռեջեփ Թայիփ Էրդողանը սկսել է իր շրջագայությունն աֆրիկյան երկրներում։ Առաջին կանգառն Անգոլան էր:
Էրդողանը ելույթ է ունեցել Անգոլայի խորհրդարանում՝ անդրադառնալով երկկողմ հարաբերություններին, համագործակցության ներուժին, այդ թվում նաև ժողովրդավարության և տնտեսության զարգացման հարցում:
Էրդողանը խոսել է նաև միջազգային կարգերի թուրքական կոնցեպտի մասին՝ կրկնելով, որ «աշխարհը 5-ից մեծ է»՝ նկատի ունենալով ՄԱԿ ԱԽ անդամ 5 մշտական անդամներին:
Ըստ Էրդողանի՝ Թուրքիան գաղութատիրական անցյալ չի ունեցել, զուգահեռաբար 100 տարի պայքար է մղել իմպերիալիստական ուժերի դեմ, իսկ հիմա էլ պայքարում է միջազգային կարգերի անարդարությունների դեմ:
«Մենք պաշտպանում ենք այն տեսակետը, որ մարդկության ճակատագիրը չպետք է թողնել 2-րդ համաշխարհային պատերազմը հաղթած մի խումբ երկրների ողորմածությանը»:
Թուրքիայի նախագահի դիտարկմամբ՝ անհնար է, որ համաշխարհային անվտանգության ճարտարապետությունը նույնը մնա, երբ աշխարհը փոխվում է, արմատական վերափոխման են ենթարկվում, դիվանագիտությունը, առևտուրը և միջազգային հարաբերությունները:
Նա կարծիք է հայտնել, որ միջազգային կարգերի փոփոխության պահանջների անտեսումն անարդարություն է Աֆրիկա մայրցամաքի և Անգոլայի նման ուժեղ երկրների նկատմամբ:
Այս համատեքստում էրդողանը խոսել է Աֆրիկայի հանդեպ Արևմուտքի մոտեցումների և քաղաքականության մասին՝ նշելով. «Դեռ կան երկրներ, որոնք չեն ընդունում Աֆրիկայի ժողովուրդների անկախությունը և հավասարությունը: Թուրքիան մերժում է Արևմուտքի օրիենտլիստական մոտեցումները Աֆրիկա մայրցամաքի նկատմամբ և Աֆրիկայի բոլոր ժողովուրդներին համարում է Թուրքիային բարեկամ»:
Նշենք, որ հիմա վետո կիրառելու իրավունք ունեն միայն ՌԴ-ն, ԱՄՆ-ը, Մեծ Բրիտանիան, Ֆրանսիան և Չինաստանը։ Էրդողանն ասել է, թե քաղաքականության իրականացումը չի կարելի թողնել ֆաշիզմը հաղթած խմբի վրա։
