Երբ վարչապետը հանդիպի Էրդողանի հետ, մենք ամեն ինչ կորցնելու ենք. այդ բանակցություններից ոչ մի շահ չենք ունենալու. Հարութ Սասունյան

«Ես մի տարի է՝ ասում եմ՝ վարչապետ Փաշինյանը, որ ղեկավարն է ջախջախիչ պարտություն կրող կողմի, չի կարող շարունակել իր պաշտոնավարումը: Որևէ երկրում՝ նույնիսկ ամենահետամնաց երկրներում, եթե ղեկավարն այդպիսի մեծ ձախողության պատասխանատուն լիներ, ինքնակամ, առանց ճնշումի, առանց պահանջի ու ցույցերի, նույն օրը հրաժարականը կտար և թույլ կտար, որ մի նոր ղեկավար գար պաշտոնի և փորձեր ուղղել ու փրկել այն, ինչ փոքր չափով կարելի էր փրկել այսքան մեծ կորստից հետո»,- 168.am-ի հետ զրույցում անդրադառնալով հայաստանյան վերջին զարգացումներին՝ նշեց ամերիկահայ հասարակական գործիչ, «Կալիֆոռնիա Կուրիեր» (The California Courier) թերթի գլխավոր խմբագիր և հրատարակիչ Հարութ Սասունյանը:

Նա ընդգծեց՝ խոսում է նոր ղեկավարի, նոր փորձառու թիմի մասին, ինչը, ըստ նրա, հնարավոր է՝ հաշվի առնելով աշխարհասփյուռ 10 միլիոն հայերի ներուժը: Ըստ նրա՝ ադրբեջանցիների վերջին սադրիչ ու սանձարձակ գործողությունների պատճառը ևս ձախողված ղեկավարն է.

«Ինչ վերաբերում է ազերիների այդ լկտի վերաբերմունքին, դա էլ չի զարմացնում. Մեր թշնամիները՝ Ադրբեջանը և Թուրքիան, շատ լավ են հասկանում, որ գործ ունեն մի մարդու հետ, որն ամբողջովին ընկճված է, ձախողվել է, և իրեն ինչ ասում են, առաջարկում են, հրահանգում են, ինքն անմիջապես համաձայնում է»:

Ամերիկահայ հասարակական գործչից նաև հետաքրքրվեցինք, թե ինչ հետևանքներ պետք է ակնկալել Հայաստանի և Թուրքիայի նախագահների հնարավոր հանդիպումից, քանի որ վերջերս Ռեջեփ Թայիբ Էրդողանը նշել էր, թե Վրաստանի վարչապետն իրեն է փոխանցել Հայաստանի վարչապետ Նիկոլ Փաշինյանի՝ հանդիպում անցկացնելու առաջարկը, ի պատասխան՝ նա նշեց.

«Ես տեղյակ չէի այս հայտարարության մասին, բայց եթե այդ տեղեկությունը ճիշտ է, հակառակ եմ նման հանդիպման Փաշինյանի և էրդողանի միջև: Ես մի քանի անգամ նշել եմ, որ հակառակ չեմ, որ մենք խոսենք մեր թշնամիների հետ, բայց կարևորն այն է, թե ով է խոսողը. եթե խոսողը բանիմաց, կարող անձնավորություն է, շատ լավ, մենք վստահում ենք այդ անձին, որպեսզի հանդիպի և դուրս գա հայությանն ի նպաստ որոշումներով, սակայն, քանի որ վարչապետն անկարող մի անձնավորություն է և չի իմանում իր արածը, իր ասածը, վախս այն է՝ երբ վարչապետը հանդիպի Էրդողանի հետ, մենք ամեն ինչ կորցնելու ենք, այդ բանակցություններից ոչ մի շահ չենք ունենալու, ճիշտ հակառակը՝ շատ բան վնասելու ենք:

Ես վերջին օրերին այդպիսի հանդիպումը, որ կանխատեսել էի, նմանացրել էի մի գայլի և մի ոչխարի միջև հանդիպման: Նման հանդիպման արդյունքը, գիտենք՝ ինչ է լինում:

Առավել՝ ընդհանրապես, աշխարհում ընդունված է, որ երկու երկրների ղեկավարների հանդիպումից առաջ ընթանում է մի երկարևատև պրոցես, ավելի ցածր մակարդակի պաշտոնյաներ, օրինակ՝ ԱԳ ղեկավարը, փոխնախարարները կապ են հաստատում նույն մակարդակի պաշտոնյաների հետ, երկար խոսում են, բանակցում, թե ինչ հարցերի մասին են ուզում զրուցել, ինչ կարելի լուծումներ կան այդ հարցերի շուրջ, այդ բոլորը պատրաստում են և ներկայացնում են իրենց ղեկավարներին: Ու միայն այդ ամենը համաձայնեցնելուց հետո է, որ երկու ղեկավարները հանդիպում են. լինում է պրոտոկոլային հանդիպում, և պարզապես ստորագրում են այն, ինչ նախօրոք համաձայնեցվել է ավելի ցածր մակարդակով»:

Հարութ Սասունյանը հավելեց նաև, որ ԱԳՆ խոսնակն ընդամենը մեկ շաբաթ առաջ էր հերքել Հայաստանի և Թուրքիայի միջև բանակցությունների մասին տեղեկությունները.

«Այս հայտարարությունը ես շատ լուրջ եմ ընդունում, սակայն ստացվում է՝ ԱԳՆ-ն հերթական անգամ անտեղյակ է, թե Փաշինյանն ինչ է անում այլ երկրների հետ, և այդ էր պատճառը, որ վերջին երկու ԱԳ նախարարները հրաժարվեցին (որովհետև Փաշինյանը նրանց չէր տեղեկացնում նույնիսկ, թե ինչ է բանակցում այս կամ այն երկրի հետ), և հնարավոր է՝ հիմա էլ որոշ բանակցություններ են տեղի ունենում գաղտնի, և մեր Արտգործնախարարությունը, դժբախտաբար, մի անգամ ևս դուրս է մնացել այդ բանակցություններից և անտեղյակ է: Հավանաբար դա է պատճառը, որ ԱԳՆ-ն ասել է, թե բանակցություններ չկան Թուրքիայի հետ. ես ավելի հավատում եմ այդ տարբերակին, քան հավատամ, որ ԱԳՆ-ն սուտ բաներ է հայտարարում այս ժողովրդին»:

Հիշեցնենք՝ դեռ սեպտեմբերի 13-ին Հայաստանի արտաքին գործերի նախարարության խոսնակ Վահան Հունանյանը վստահեցրել էր՝ այս պահին Հայաստանի և Թուրքիայի միջև հարաբերությունների կարգավորման նպատակով բանակցություններ չեն ընթանում:

Հայաստանի կառավարությունը պատրաստ է Թուրքիայի հետ բարձր մակարդակի երկխոսություն սկսել, եթե արդյունավետ շփումներ սկսվեն Երևանի և Անկարայի միջև. այս մասին էլ երեկ ռուսաստանյան ՏԱՍՍ գործակալությանը հայտնել էր Հայաստանի վարչապետի խոսնակ Մանե Գևորգյանը։

Նկատենք՝ արդեն երկրորդ ամիսն է՝ պաշտոնական Երևանն ու Անկարան հեռակա ուղերձներ են փոխանակում հարաբերությունների կարգավորման վերաբերյալ:

Ամփոփելով զրույցը՝ ամերիկահայ հասարակական գործիչ, «Կալիֆոռնիա Կուրիեր» (The California Courier) թերթի գլխավոր խմբագիր և հրատարակիչ Հարութ Սասունյանը վստահեցրեց, որ իր քննադատությունը կառուցողական է, քանի որ ինքը ցանկանում է, որպեսզի մեր պետությունը հաջողի. «Մի օրինակ նշեմ իմ ասածը փաստելու համար, որ վարչապետի դեմ որևէ բան չունեմ և պարզապես ցանկանում եմ՝ սխալներն ուղղենք. 2019 թ. գարնանը, երբ վարչապետը գնաց Եվրոպական խորհրդի համաժողովին, այնտեղ ելույթ ունեցավ, ես լսեցի իր ելույթը և անմիջապես մի վերլուծում գրեցի իմ թերթում՝ ասելով, որ վարչապետի ելույթն իսկապես հոյակապ էր, և մեջբերումներ արեցի այդ ելույթից:

Նաև հավելեցի, որ ավելի տպավորիչը այն էր, որ երբ ելույթից հետո ներկաները, մասնավորապես՝ Ադրբեջանի և Թուրքիայի ներկայացուցիչները, շատ խիստ խոսքեր ասեցին, հարցեր ուղղեցին Հայաստանի վարչապետին, նա իր առաջ չուներ ոչ մի կտոր թուղթ, որից կկարողանար կարդալ պատասխանները, և ինքը շատ լավ պատասխանեց այդ հարցերին:

Մի քանի օր անց զարմացա և ուրախացա, որ վարչապետը տեղադրել է իմ վերլուծությունն իր ֆեյսբուքյան էջում: Ես սա նշում եմ՝ ցույց տալու, որ ես գնահատում եմ լավ աշխատանքը և քննադատում վատ աշխատանքը: Եվ մեր ժողովրդին ևս խորհուրդ կտայի չգերագնահատել ոչ մի անձ՝ ով որ լինի այդ անձը. պետք է լավը գնահատել և վատը քննադատել»:

Մանրամասները՝ տեսանյութում

Տեսանյութեր

Լրահոս