Վարդան Ղուկասյանի որդին ազատ է արձակվել դատական նիստերի դահլիճից․ «Փաստինֆո»
Գյումրիի նախկին քաղաքապետ Վարդան Ղուկասյանի որդին՝ Սպարտակ Ղուկասյանը չի կալանավորվի։ Շիրակի մարզի ընդհանուր իրավասության դատարանը մերժել է Սպարտակ Ղուկասյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Դատարանի որոշման հրապարակումից հետո Ղուկասյանն ազատ է արձակվել՝ հենց դատական նիստերի դահլիճից։ Այս մասին «Փաստինֆո»-ի հարցին ի պատասխան հայտնեցին ՔԿ-ից։
Հիշեցնենք, որ Սպարտակ Ղուկասյանը ձերբակալվել է օգոստոսի 19-ին՝ ոստիկանության ծառայողի նկատմամբ բռնություն գործադրելու սպառնալիքների կասկածանքով։ Մասնավորապես, ՔԿ-ն հայտնել էր, որ Գյումրի քաղաքի բնակչուհին դիմում է ներկայացրել այն մասին, որ 2021թ. օգոստոսի 17-ին՝ ժամը 23:00-23:15-ի սահմաններում, Գյումրի քաղաքի նախկին քաղաքապետ Վարդան Ղուկասյանը որդու՝ Սպարտակ Ղուկասյանի և երեք-չորս տղամարդկանց հետ մտել է իր տան բակ՝ իր թոռան հետ պարզաբանումներ կատարելու նպատակով։
ՀՀ ոստիկանության Կումայրիի բաժնի քրեական հետախուզության աշխատակիցները, քաղաքացու դիմումում մատնանշված հանգամանքներն ստուգելու նպատակով, այցելել են Գյումրու նախկին քաղաքապետի բնակության վայր, սակայն Սպարտակ Ղուկասյանը նախ՝ հրաժարվել է տան դուռը բացել, այնուհետև՝ ժամեր անց, զանգահարել է իշխանության ներկայացուցիչ հանդիսացող ՀՀ ոստիկանության Կումայրիի բաժնի քրեական հետախուզության բաժանմունքի պետին, սպառնացել բռնություն գործադրել նրա նկատմամբ` կապված վերջինիս կողմից իր ծառայողական պարտականությունները կատարելու հետ: Հարուցվել է քրեական գործ՝ ՀՀ քրեական օրենսգրքի 316-րդ հոդվածի 1-ին մասով, քրեական հետախուզության բաժանմունքի պետը ճանաչվել է տուժող։ Հարուցված քրեական գործի շրջանակներոմ Ղուկասյանը նախ ձերբակալվել էր, ապա նրան մեղադրանք է առաջադրվել՝ ՀՀ քրեական օրենսգրքի 316-րդ հոդվածի 1-ին մասով։
Քննիչը միջնորդություն է ներկայացրել դատարան՝ Ղուկասյանի նկատմամբ կալանավորումը որպես խափանման միջոց ընտրելու մասին, որը մերժվել է։
