Սուրեն Պապիկյանի ծառայողական մեքենայի մասնակցությամբ վթարի փաստի առթիվ քրեական գործ է հարուցվել

Ոստիկանության լրատվական ծառայությունից 168.am-ին հայտնում են, որ Արարատի մարզի Սուրենավան գյուղում նախորդ ամիս տեղի ունեցած վթարի փաստով քրեական գործ է հարուցվել և ուղարկվել է դատախազություն ընդդատության հարցը որոշելու․

«Հուլիսի 16-ին այդ դեպքով հարուցվել է քրեական գործ և ուղարկվել է նախաքննության»։

Նշենք, որ քրեական գործ հարուցելու մասին ո՛չ ոստիկանության, ո՛չ էլ Քննչական կոմիտեի պաշտոնական կայքերում որևէ տեղեկություն չկա հրապարակված։

168.am-ը Քննչական կոմիտեի մամուլի քարտուղար Վարդան Թադևոսյանից հետաքրքրվեց, թե նախաքննությունը ո՞ր փուլում է, արդյոք որպես մեղադրյալ ներգրավված անձ կա՞։

«2021թ. հունիսի 16-ին` ժամը 15:45-ի սահմաններում, Երևանի բնակիչ Ա.Սաֆարյանն իր կողմից վարվող TOYOTA LC 200 մակնիշի ծառայողական 022 TT 55 հաշվառման համարանիշի ավտոմեքենայով Մեղրի-Երևան ավտոճանապարհի 320-րդ կիլոմետրի՝ Արարատի մարզի Սուրենավան գյուղի ճանապարհահատվածում, բախվել է Արարատի մարզի բնակիչ, անչափահաս՝ 03.07.2007թ. ծնված պատանու կողմից վարած Վազ-2121 մակնիշի ավտոմեքենային, որի հետևանքով Ա.Սաֆարյանը և ուղևոր Է.Դավթյանը ստացել են առողջության թեթև վնասի հատկանիշներ չպարունակող մարմնական վնասվածքներ, իսկ անչափահաս տղան՝ կյանքին վտանգ սպառնացող ծանր վնաս: Դեպքի առթիվ ՀՀ ոստիկանության ճանապարհային ոստիկանության ՃՊԾ 2-րդ սպայական գումարտակում նախապատրաստված նյութերով 16.07.2021թ. ՀՀ քրեական օրենսգրքի 242-րդ հոդվածի 1-ին մասով հարուցվել է քրեական գործ, որը 23.07.2021թ. ուղարկվել է ՀՀ ՔԿ Արարատի մարզային քննչական վարչություն և ընդունվել վարույթ»,- ասաց Թադևոսյանը։

Իսկ հարցին, թե արդյոք Տարածքային կառավարման և ենթակառուցվածքների նախարար Սուրեն Պապիկյանը մեքենայում չի՞ եղել, քանի որ, մեր հավաստի տեղեկություններով, նա ևս մեքենայում է գտնվել, ՔԿ մամուլի խոսնակը պատասխանեց․

«Ըստ Քննչական կոմիտեի Արարատի մարզային քննչական վարչության TOYOTA LC 200 մակնիշի ծառայողական 022 TT 55 հաշվառման համարանիշի ավտոմեքենայում եղել են վարորդը և նրան ուղեկցող 1 մարդ, որը Սուրեն Պապիկյանը չէ»։

Ավելի վաղ 168.am-ը հայտնել էր, որ հունիսի 16-ին Վայոց ձորի մարզից Երևան գալու ճանապարհին Տարածքային կառավարման նախարար Սուրեն Պապիկյանի Toyota Land crauser մակնիշի 36 RO 720 օպերատիվ պետհամարանիշերով մեքենան մեծ արագությամբ ընթանալիս Արարատի մարզի Սուրենավան գյուղի մոտ հարվածել է դիմացից ընթացող Նիվա մակնիշի ավտոմեքենային, ինչի հետևանքով մեքենայի մեջ գտնվող երեխան ծայրահեղ ծանր վիճակում տեղափոխվել էր հիվանդանոց։

168.am-ի տեղեկություններով՝ Սուրեն Պապիկյանի օգնականներն արագ հանել են մեքենայի պետհամարանիշերը, և իշխանություններն ամեն ինչ անում են դեպքը կոծկելու համար։ Ի դեպ, Սուրեն Պապիկյանը գտնվել է մեքենայում։