ՊԵԿ-ում 135 միլիոն դրամի նոր պարտավորվածություն են ստանձնել, թեև Ֆիննախը դեմ է դրան

Պետական եկամուտների կոմիտեն Կառավարության համաձայնությանն է ներկայացրել որոշման նախագիծ, որով 2021 թվականի պետական բյուջեում կկատարվի վերաբաշխում ու ՊԵԿ-ին կհատկացվի շուրջ 71 միլիոն դրամ՝ մի շարք ծրագրեր իրականացնելու համար, միևնույն ժամանակ 135.8 մլն դրամի լրացուցիչ բեռ կառաջանա բյուջեի համար։

Մասնավորապես, ՊԵԿ-ից հիմնավորել են, որ գումարներն անհրաժեշտ են Արևմտյան մաքսատուն-վարչության վարչական շենքի և Սյունիքի մարզի ք. Սիսիանում գտնվող Հարավային մաքսա­տուն-վարչության տարածքների վերանորոգ­ման աշխատանքների նախագծանա­խահաշվային փաստաթղթերի ձեռքբեր­ման, ինչպես նաև Հարավային մաքսատուն-վարչության Մեղրիի մաքսային կետ-բաժնի արդիականացման և վերակառուց­ման ծրագրով նախատեսված տարածքի ընդլայնման համար նոր տարածքների՝ հողամասերի և շենք-շինությունների և Կոմիտեի աշխա­տակիցների համար Ագարակ համայն­քում ծառայողական բնակելի շենքի կառուցման նպատակով։

Ինչ վերաբերում է 135.8 մլն դրամի լրացուցիչ պարտավորվածությանը, ապա սրա վերաբերյալ առարկություն է ներկայացրել Ֆինանսների նախարարությունը։

Ֆիննախից առարկել են առ այն, որ 2022-2024թթ. պետական միջնաժամկետ ծախսերի ծրագրի և 2022թ. պետական բյուջեի հայտերում ներքին աղբյուրների հաշվին շենքերի և շինությունների հիմնանորոգման ու շինարա­րության գործող և նոր միջո­ցառում­ների գծով առանց այդ էլ եռամյա ժամանակահատվածի համար հայտագրվել է, համապատասխանաբար, 5,415.7 մլն դրամ, 5,220.8 մլն դրամ և 3,315.2 մլն դրամ, սակայն այդ օբյեկտների ցանկում ընդգրկված չեն ՊԵԿ-ի՝ այժմյան նախագծով ներկայացված օբյեկտները:

Բացի այդ, ՀՀ կառավարության որոշմամբ 5.9 մլն դրամ է հատկաց­վել Կոմիտեի Երևան քաղաքի Կոմիտաս 35 հասցեում գտնվող շենքի կիսանկուղային հարկում տարածքի ճաշարանի վերակա­ռուցման և Դեղատան 3 հասցեում գտնվող վարչա­կան շենքի վերա­նորոգման աշխատանքների նախագծա­նախահաշվային փաստաթղթերի ձեռքբերման համար, իսկ դրանց շինվերանորոգման աշխատանքների համար հարկավոր է շուրջ 155.7 մլն դրամ, ինչը նույնպես ներառված չէ ՊԵԿ-ի ներկայացրած հայտերում, ուստի դրանց ձեռքբերումն իրենից ենթադրում է շինվերա­նորոգման աշխատանքների իրականացում՝ առանց բյուջետային ծախսերի միջնաժամկետ պլանավոր­ման։

Հաշվի առնելով սա՝ Ֆինանսների նախարարությունը կասկածի տակ է դրել բյուջեի վրա 135.8 մլն դրամի նոր պարտավորու­թյունների ստանձնման նպատակահարմարության հարցը՝ բյուջետային ռեսուրսների ներկայիս սահմանափակ հնարավորությունների համատեքստում:

Չնայած Ֆինանսների նախարարության ներկայացրած առարկությանը՝ Կառավարությունը ՊԵԿ-ի ներկայացրած նախագիծն ընդունել է։