Թուրքիան կփորձի կանխել եվրոպական խորհրդարաններում ցեղասպանության բանաձևերի ընդունումը․ Չելիք
Թուրքիայում իշխող «Արդարություն և զարգացում» կուսակցության (ԱԶԿ-AKP) խոսնակ Օմեր Չելիքը կուսակցության նիստից հետո կրկին անդրադարձել է ԱՄՆ նախագահ Ջո Բայդենի կողմից Հայոց ցեղասպանության ճանաչմանն ու դրա շուրջ ապագա զարգացումներին: Այս մասին տեղեկացնում է ermenihaber.am-ը։
Պատասխանելով լրագրողի հարցին, թե արդյոք Թուրքիան միջոցներ ձեռնարկելու է Բայդենի հայտարարությունից հետո որոշ եվրոպական երկրների խորհրդարանների օրակարգ բերվող ցեղասպանության բանաձևերի ընդունումը կանխելու համար, Չելիքը նշել է, որ իրենք արդեն խոսել են այն մասին, թե «իրավական ու քաղաքական տեսանկյունից ինչքան անհիմն է այդ որոշումը»:
«Դա տարածաշրջանային կարգավորումը խաթարող, հայկական սփյուռքի խաղաթուղթ հանդիսացող որոշում է: Ոչ ոքի ձեռքում չկան եղածը ցեղասպանություն որակելու համար անհրաժեշտ պատմական ու իրավական փաստեր»,- Անկարայի ժխտողական թեզերն է պնդել Չելիքը:
Նա նաև նշել է, որ 1915-ին տեղի ունեցած դեպքերի վերաբերյալ Թուրքիան շատ ինքնավստահ դիրքորոշում ունի: Ըստ նրա՝ ցեղասպանության բանաձևերը Թուրքիայի դեմ օգտագործվող քաղաքական ճնշման գործիքներ են:
«Այդ գործիքների դեմ, իհարկե, շարունակում ենք մեր դիվանագիտական ջանքերը: Շարունակելու ենք պայքարը եվրոպական երկրների խորհրդարանում հնարավոր նոր որոշումների ընդունումը կանխելու նպատակով»,- ընդգծել է Չելիքը:
Վերջինս չի ընդունել Թուրքիայում տարբեր ընդդիմադիր շրջանակների կողմից հնչեցվող մեղադրանքներն առ այն, որ ԱՄՆ-ի նախագահի որոշմանն ընդառաջ իրենց կառավարությունը բավարար միջոցներ չի ձեռնարկել որոշումը կանխելու համար:
