Հայաստանում ովքե՞ր կկարողանան պատվաստվել «Սպուտնիկ V»-ով
«Սպուտնիկ V» ռուսական դեղամիջոցով պատվաստումը Հայաստանում կմեկնարկի ապրիլի 19-ից։ Արդեն ներկրվել է 15.000 դեղաչափ:
«Երկուշաբթի օրվանից առաջին օղակում պատվաստումները կիրականացվեն նաև «Սպուտնիկ V»-ով: Պատվաստանյութը նախատեսված է բուժաշխատողների, խրոնիկ հիվանդություններ ունեցողների, սոցիալական հաստատությունների աշխատողների, 18-ից մինչև 55 տարեկան քաղաքացիների համար։ Իսկ 55-ից բարձր տարիք ունեցող քաղաքացիները կպատվաստվեն «Astra Zeneca»-ով»,- 168.am-ի հետ զրույցում ասաց ՀՀ առողջապահության նախարարության մամուլի քարտուղար Հռիփսիմե Խաչատրյանը։
Հավելենք, որ ապրիլի 17-ի ժամը 11:00-ի դրությամբ հաստատվել է կորոնավիրուսային հիվանդության ընդհանուր 207973 դեպք, որոնցից 187256-ը` առողջացած, 3859-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 15880 պացիենտ: Ընդհանուր առմամբ կատարվել է 931583 թեստավորում:
Այսպիսով` ապրիլի 16-ին կատարվել է 5290 թեստավորում, որից հաստատվել է կորոնավիրուսային հիվանդության 870 նոր դեպք: Ունենք 1056 առողջացած և 24 մահվան դեպք:
Նախորդ օրն արձանագրվել է մահվան 9 դեպք, երբ պացիենտներն ունեցել են կորոնավիրուսային վարակ, սակայն մահը վրա է հասել այլ հիվանդության պատճառով։ Այդպիսի դեպքերի ընդհանուր թիվը 978 է:
