Ի՞նչ են ուզում ապացուցել, ես այդ փողը ստացել, տարել եմ մեր տո՞ւն. Թիվ 2 բուժմիավորման տնօրենը՝ բժիշկների աշխատավարձը ուշացնելու մասին

Ապրիլի 8-ին գրել էինք, որ արդեն ապրիլ ամիսն է, բայց Թիվ 2 բուժմիավորման ստացիոնար և պոլիկլինիկական ծառայության բժիշկները չեն ստացել անգամ փետրվարի աշխատավարձը:

168.am-ին ահազանգած բժիշկների խոսքով՝ հետաքրքիրն այն է, որ, օրինակ, բուժմիավորման տնօրեն Տիգրան Խաչատրյանը միջոցներ գտնում է վճարել ադմինիստրատիվ աշխատողների և կրտսեր բուժաշխատողների ու սպասարկող անձնակազմի աշխատավարձերը, սակայն, չգիտես՝ ինչու, մտածել է, որ բժիշկներն այդ գումարի կարիքը չունեն, կամ ունեն, բայց չեն աղմկի, ինչպես, ասենք, վերը նշված աշխատակիցները:

Հարցին, թե երկու հաստատություններն էլ նույն ա՞նձն է ղեկավարում, պատասխանել էին, որ պոլիկլինիկական ծառայությունը ղեկավարում է Դավիթ Մաթևոսյանը, ով, սակայն, ֆինանսական խնդիրների լուծման հարցում իրավասություններ չունի:

Խնդրի հետ կապված՝ Առողջապահության նախարարությունից տեղեկացրեցին, որ ոչ մի պարտք-պահանջ նախարարությունը պոլիկլինիկայի հետ չունի:

Փոխանցեցինք, որ այն մասնավոր հիմնարկ է, իրենց ենթակայության ներքո չէ, սակայն ունի պետական պատվերի պայմանագիր, ու ինչքան կատարողական ունեն պետպատվերով՝ տվել են, պոլիկլինիկայի գումարն էլ՝ հետը, սահմանված կարգով:

Նախարարությունից չհստակեցրեցին, թե գումարը որ օրն են փոխանցել, սակայն շեշտեցին, որ Առողջապահության նախարարության և տվյալ կազմակերպության միջև կնքված պետական պատվերի շրջանակներում բժշկական ծառայությունների մատուցման պայմանագրի դրույթների համաձայն՝ գումարը փոխանցվել է:

Կապ հաստատեցինք նաև բուժմիավորման տնօրեն Տիգրան Խաչատրյանի հետ՝ հետաքրքրվելով, թե ո՞րն է բժիշկների՝ աշխատավարձ չստանալու պատճառը, վերջինը պատասխանեց.

«Իրենք այսօր ստացել են աշխատավարձ: Օբյեկտիվ պատճառներով ուղղակի ուշացում ունեինք, իսկ այսօր բոլոր ստացել են աշխատավարձ: Այսօր իրենց աշխատավարձի պարտքերը փակվել են, ուշացում չկա: Մաքսիմում 1 ամիս 15 օր է եղել ուշացումը: Բացի նախարարությունից մենք ունենք վճարովի ծառայություններ, որոնք գումարվում են իրար: Եղել են նաև  տարբեր օբյեկտիվ պատճառներ.անցած տարի հիմնարկը ոչ մի պլանային հիվանդ չի ընդունել, ֆինանսների կրճատումներ են եղել: Հասկանո՞ւմ եք, եղել է արտակարգ դրություն: Ես այս ընթացքում ոչ աշխատող եմ կրճատել, ոչ աշխատավարձ ու զարմանում եմ, որ կոլեկտիվն այդպես է գնահատում իմ արարքը: Բոլոր հիմնարկներում և՛ կրճատումներ են անում և՛ աշխատավարձ են կրճատում, բայց ես այդպես չեմ վարվել և ուզել եմ կոլեկտիվը նորմալ պահել: Անցած տարի մեկ ամսվա ուշացում չի եղել, միևնույն ժամանակ ոչ մի պլանային հիվանդ չենք ընդունել ու այսօր իրենք նման բողոքնե՞ր են անում: Ի՞նչ են ուզում ապացուցել, ես այդ փողը ստացել, տարել եմ մեր տո՞ւն: Բնականաբար նման բան հնարավոր չէ: Կան օբյեկտիվ պատճառներ, որոնք բերել են որոշ ուշացումների: Պատրաստ եմ միշտ պատասխանել ցանկացած հարցի և ապացուցել իմ պատասխանի իսկությունը»:

Հավելենք, որ դեռևս փետրվար ամսին 168.am-ն ահազանգ է ստացել «Թիվ 2 բուժմիավորում» ՓԲԸ մի խումբ աշխատակիցներից, ովքեր բողոքում էին բուժմիավորման ապօրինի գործելակերպից։

Խնդիրն այն է, որ տնօրեն Տիգրան Խաչատրյանը բուժմիավորման աշխատակիցներին ստորագրման է տվել կամայական կազմված մի փաստաթուղթ, համաձայն որի՝ ՀԴՄ կտրոն չտրամադրելու համար վերջիններս ենթարկվելու են տույժերի, ինչպես նաև կարող են հեռացվել աշխատանքից։