Լյուքսեմբուրգցի նոտարն ապօրինի գործարքներ է իրականացրել ադրբեջանցիների համար. Reporter-ի բացահայտումը

Լյուքսեմբուրգյան Reporter կայքը բացահայտել է լյուքսեմբուրգցի նոտար Փոլ Բետինգենի կողմից օրենքի խախտումներով ադրբեջանցի հաճախորդների ֆինանսական աղբյուրների վրա աչք փակելու և միլիոնավոր դոլարների արժողությամբ անշարժ գույք ձեռք բերելու դեպքեր։

Նոտարը, մասնավորապես, կատարել է գործարքներ՝ Լյուքսեմբուրգի կենտրոնում բնակարաններ գնելով ադրբեջանցի հաճախորդների համար, որոնց ֆինանսական միջոցները հոսել են Բրիտանական Վիրջինյան կղզիներում գրանցված հաշիվներից դեպի Ռուսաստան, ապա անհետացել։

Մեղադրյալը, ով նոտարական գործով է զբաղվել 1984-ից մինչև 2020 թթ, ընդունել է դատավճիռը և հարկադրվել վճարել սահմանված 70 հազար եվրո տուգանքը՝ փողերի լվացման և ահաբեկչության ֆինանսավորման դեմ պայքարում մասնագիտական լուրջ ձախողում թույլ տալու համար։

Հոդվածը հիշեցնում է Ադրբեջանի միջազգային բանկի (IBA)՝ ֆինանսական սկանդալի կիզակենտրոնում հայտնվելու մասին, որն ավելի հայտնի է ադրբեջանական լվացքատուն անվամբ և որին 2019 թ․ անդրադարձել էր նաև Forbes ամսագիրը՝ բացահայտելով բանկի նախկին նախագահ Ջահանգիր Հաջիևի կապը Խագանի Բաշիրովի հետ։ Վերջինս լյուքսեմբուրգյան հետաքննության համար կարևոր դերակատարներից է եղել, որի արդյունքում էլ ապացուցվել է նոտարի մեղսակցությունը։

Բաշիրովը, ով ծնունդով Կիրովաբադից է ֆրանսիական քաղաքացիությամբ և ունի Լյուքսեմբուրգում օրինական բնակության իրավունք, հանդիսանում է Լյուքսեմբուրգ-Ադրբեջան առևտրային պալատի հիմնադիրների մեկը՝ ADR կուսակցության նախկին պատգամավորի և Cargolux ընկերության նախկին առևտրային տնօրենի հետ միասին։

Հոդվածում մի շարք բացահայտումներ են ներկայացված նաև Bakinshaat ընկերության միջոցներով (շահառուները լյուքսեմբուրգաբնակ ադրբեջանցիներ են) Լյուքսեմբուրգում անհայտ ֆինանսական աղբյուրներից ստացված գումարներով անշարժ գույքի ձեռքբերման մասին։ Նշվում է, որ սույն ընկերության անունը Times of Israel թերթը հիշատակել էր անցյալ տարի Ռուսաստանի միջոցով իսրայելական Aerospace Industrie ընկերության կողմից ադրբեջանցիներին վճարված 2,8 միլիոն դոլարի մասին, որի հետ ավելի վաղ կնքվել էր վիճահարույց զենքի պայմանագիր։

Reporter-ը գրում է, որ Լյուքսեմբուրգում ադրբեջանական համայնքը սերտ կապեր է ստեղծել երկրի էլիտայի բնիկ ներկայացուցիչների հետ՝ ընդհուպ մինչև մշակութային և բարեգործական մակարդակներում․ Լյուքսեմբուրգ-Ադրբեջան առևտրային պալատը տարիներ շարունակ տաղավար է ունեցել միջազգային տոնավաճառում, իսկ Լյուքսեմբուրգում «Ղարաբաղ» ադրբեջանական մշակութային ասոցիացիան բավականին մեծ թվով մարդկանց է համախմբել դրա հիմնադիրներից Սեյմուր Ահմադովի շուրջ, ով նաև VPA հեռահաղորդակցության և հեռարձակման ընկերության տնօրենն է։ Իսկ «Ղարաբաղ» ասոցիացիայի նախագահի պաշտոնը մինչև նախորդ տարվա հոկտեմբեր զբաղեցրել է լյուքսեմբուրգցի հայտնի խոհարար-վարպետ Լեա Լինսթերը։