Ադրբեջանցիները պահանջել են, որ հայ տղաները դուրս գան բարից. ծեծկռտուք  Տոմսկում

Համացանցում տեսանյութ է հրապարակվել, թե ինչպես ՌԴ Տոմսկ քաղաքի բար-սրճարաններից մեկում մի խումբ ադրբեջանցիներ հարձակվում ու ծեծի են ենթարկում հայերին։

Տեսանյութ տարածողներից շատերը չեն գրում, որ հարձակումը կատարվել է հայերի նկատմամբ, միայն գրում են, որ ադրբեջանցիները ծեծկռտուք են սարքել բարում ու ծեծել հաճախորդներին։ Այդ ամենը վրդովվեցրել է ադրբեջանցիների կողմից ծեծի ենթարկված հայ տղաներից մեկի քրոջը։

Ըստ նրա՝ ադրբեջանցիներն իմացել են, որ բարի այցելուները հայեր են, դրա համար էլ հարձակվել են նրանց վրա։

168.am-ի հետ զրույցում վերջինս պատմեց, որ եղբայրները գնացել են բար՝ ընկերներից մեկի ծննդյան օրը նշելու։

«Երբ եղբայրներս արդեն նստած են լինում, ադրբեջանցիները պահանջում են, որ նրանք դուրս գան բարից, գնան, եղբայրս հարցնում է, թե ինչո՞ւ են իրենց դուրս հանում, դրանից հետո էլ սկսվում է ծեծկռտուքը։ Տեսանյութում պարզ երևում է, որ առաջինն ադրբեջանցին է հարձակվում եղբորս վրա, մի քանի հոգով հարձակվում են մեկ հոգու վրա։ Հորաքրոջս տղայի ծնոտը այդ ծեծի հետևանքով վիրահատել են։ Հիվանդանոցում վիրահատության ժամանակ ոստիկանությունը եկել է, ու պարզվել են ծեծկռտուքի հանգամանքները։ Հարազատ եղբորս այտոսկրն է կոտրվել»,- նշեց նա։

Նրա խոսքով՝ ադրբեջանցիները հետո եկել ու հայերից ներողություն են խնդրել, այս պահին նրանցից մեկը ձերբակալված է։

«Ծեծկռտուքի պատճառն այն է եղել, որ հայեր են գնացել բար, հետո պարզվել է, որ բար-սրճարանի տերն էլ է ադրբեջանցի եղել, եղբայրներս չեն էլ իմացել այդ մասին։ Պարզապես նրանց հրավիրել են ծնունդի, իրենք էլ՝ առանց իմանալու, գնացել են։ Ադրբեջանցիները հանգիստ չեն թողնում հայերին, պատերազմն էլ է ավարտվել, բայց մարդկանց հանգիստ չեն թողնում, նրանք եղբայրներիս հարվածելուց ասել են՝ «Ղարաբաղը Ադրբեջան է»։ Մինչ Արցախի այս պատերազմը նման միջադեպ չէր եղել, ադրբեջանցիներն ու հայերը նույն դասարանում են սովորել, նույն համալսարանում, շփումը նորմալ է եղել։ Մեզ մոտ սա առաջին դեպքն է, որ կռիվ է եղել հայերի ու ադրբեջանցիների միջև»,- եզրափակեց նա։