ՀՀ վերաբերյալ ցանկացած որոշում պետք է ընդունվի Սահմանադրական դատարանի և Ազգային ժողովի համաձայնությամբ․ Պարույր Հայրիկյանը՝ Արցախի վերաբերյալ հայտարարության մասին
Նոյեմբերի 10-ին տարածվել է ՌԴ նախագահի, ՀՀ վարչապետի և ԱՀ նախագահի հայտարարությունը, որտեղ մասնավորապես նշված է․
Հայտարարվում է ամբողջական կրակի դադարեցում բոլոր տեսակի մարտական գործողությունների՝ Ղարաբաղյան հակամարտության գոտում, սկսած հոկտեմբերի 10-ի 00:00-ից, ըստ Մոսկվայի ժամանակի։ Ադրբեջանական Հանրապետությունը և Հայաստանի Հանրապետությունը, հետագայում՝ Կողմերը, մնում են իրենց գրավված դիրքերի վրա։
Աղդամի շրջանը և տարածքները, որոնք հսկվում են Հայկական կողմի կողմից Ղազախի շրջանում, վերադարձվում են Ադրբեջանին մինչև նոյեմբերի 20-ը։
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, մ 90 զրահատրանսպորտային և 380 ավտոմեքենաներով և հատուկ տեխնիկայով։
Խաղաղապահ զորակազմը ռուսական տեղակայվում է հայկական ուժերի դուրսբերմանը զուգահեռ։
Հայաստանը մինչև նոյեմբերի 15-ն Ադրբեջանին է վերադարձնում Քելբաջարը, մինչև դեկտեմբերի մեկը՝ Լաչինի շրջանը, թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։ Կողմերի համաձայնությամբ, առաջիկա երեք տարում կառուցվելու է նոր ճանապարհ Լաչինով, որը կկապի Ստեփանակերտը Հայաստանի հետ, հետագայում խաղաղապահների՝ այդ ճանապարհը հսկելու համար տեղակայման համար։
Ներքին տեղահանվածները և փախստականները վերադառնում են ԼՂ և հարակից շրջաններ՝ ՄԱԿ Փախստականների հարցերով բարձր հանձնակատարի հսկողության ներքո։
Հայաստանի Հանրապետությունն ապահովում է տրանսպորտային կապեր Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև ՝ երկու ուղղություններով քաղաքացիների, տրանսպորտային միջոցների և ապրանքների անխոչընդոտ տեղաշարժը կազմակերպելու նպատակով: Կողմերի համաձայնությամբ կտրամադրվի Նախիջևանի Ինքնավար Հանրապետությունը Ադրբեջանի արևմտյան շրջանների հետ կապող նոր տրանսպորտային հաղորդակցությունների կառուցում։
ԱԻՄ առաջնորդ Պարույր Հայրիկյանի կարծիքով՝ իրավիճակի շտկման ճանապարհներ կան, և ինքը՝ որպես ամենածրագրային ազգային գործիչ, ինքնորոշման շարժման հիմնադիր, ՀՀ վարչապետին հրավիրել է երկխոսության։
«Նիկոլ Փաշինյանի հետ հանդիպելու եմ, եթե չվախենա ինչ-որ բանից կամ իրեն չարգելեն։ Իրեն ասել եմ՝ կհանդիպենք՝ երբ ու որտեղ կամենա։ Պետք է խոսել հնարավոր զարգացումների մասին»,- 168.am-ի հետ զրույցում ասաց Պարույր Հայրիկյանը։
Անդրադառնալով համաձայնագրին՝ ԱԻՄ առաջնորդը նշեց․ «Եթե պետությանը վերաբերող հարց է, պետք է ներկայացուցչական մարմինը հաստատի։ Դա աշխարհում ընդունված կարգ է։ Սահմանադրական դատարանը պետք է հաստատի, հետո էլ Ազգային ժողովը։ Դե, դիկտատուրաների դեպքում ԱԺ վավերացումը պետք չէ, սակայն խոսքը միայն Արցախի մասին չի, չէ՞, նաև Հայաստանի Հանրապետության մասին է, իսկ ՀՀ վերաբերյալ ցանկացած որոշում պետք է ընդունվի Սահմանադրական դատարանի և Ազգային ժողովի համաձայնությամբ»։
