«Հարավային և հարավարևելյան ուղղություններում մեր զինված ուժերը կարողացել են հակառակորդից հետ վերցնել որոշակի դիրքեր». Արծրուն Հովհաննիսյան
Այսօր ամբողջ օրը` վաղ առավոտից, Ադրբեջանի զինված ուժերն ահաբեկչական խմբավորումների հետ միասին ռազմաճակատի գրեթե ամբողջ երկայնքով շարունակել են հարձակողական գործողությունները:
Մարտերի ինտենսիվությունը շատ բարձր չի եղել, սակայն որոշ օջախային կամ առանձին ուղղություններում ընթացել են ինտենսիվ հարձակողական գործողություններ:
Հայկական միասնական տեղեկատվական կենտրոնում տեղի ունեցած ասուլիսի ժամանակ ասաց ՀՀ ՊՆ ներկայացուցիչ Արծրուն Հովհաննիսյանը:
«Մասնավորապես, կենտրոնական ուղղությամբ 1-2 դիրքերի վրա նետելով մեծաքանակ հետևակային ուժեր, զրահատեխնիկա և օգտագործելով հրետանի, ընդ որում միաժամանակ հրետակոծելով Մարտունի քաղաքը, Ադրբեջանի զինված ուժերին հաջողվել է ունենալ որոշակի առաջխաղացում, դիրքային փոփոխություններ:
Դրան հակառակ հարավային և հարավարևելյան ուղղություններում ընթացող առանձին օջախային մարտերում մեր զինված ուժերը կարողացել են հակառակորդից հետ վերցնել որոշակի դիրքեր և ապահովել որոշակի առաջխաղացում: Այս պահի դրությամբ մարտերը շարունակվում են, դրանք մեծ ինտենսիվություն չունեն, սակայն զորատեսակային և զինատեսակային առումով կիրառվում են բավականին շատ զենքեր ու զինատեսակներ»,-հավելեց նա:
