ԱԳՆ-ն Զոհրաբ Մնացականյանի ԱՄՆ կատարելիք այցի վերաբերյալ մանրամասներ դեռ չի հաղորդում
«Աշխատանքներ են տարվում ՀՀ ԱԳ նախարար Զոհրաբ Մնացականյանի այցը Վաշինգտոն նախապատրաստելու ուղղությամբ»,-այս մասին The Hill-ին տված հարցազրույցում նշել է ԱՄՆ-ում ՀՀ արտակարգ և լիազոր դեսպան Վարուժան Ներսեսյանը։
«Ակնկալվում է, որ այցն ու հանդիպումը ԱՄՆ պետքարտուղար Մայք Պոմպեոյի հետ կկայանա այս ամիս»,- «Արմենպրես»-ի հաղորդմամբ՝ տեղեկացնում է արտասահմանյան լրատվամիջոցը՝ նկատելով, որ թեև հանդիպումը ծրագրված է ԱՄՆ-ի և Հայաստանի ամենամյա ռազմավարական երկխոսության ոգուն համապատասխան, այն նոր հրատապություն է ձեռք բերում` Լեռնային Ղարաբաղի հակամարտության սրման ֆոնին, որի հետևանքով զոհվել են տասնյակ խաղաղ բնակիչներ, վիրավորվել են հարյուրավոր և տեղահանվել տասնյակ հազարավոր մարդիկ:
Դեսպան Ներսեսյանը նշել է, որ աշխատանքներ են տարվում այցի նախապատրաստման ուղղությամբ, սակայն այցի մանրամասները պաշտոնապես կհրապարակվեն ՀՀ ԱԳՆ և ԱՄՆ պետքարտուղարության հայտարարություններով:
168․am-ը ՀՀ ԱԳՆ խոսնակ Աննա Նաղդալյանից հետաքրքրվեց, թե մասնավորապես ե՞րբ կկայանա այցը, ի՞նչ օրակարգով, որին ի պատասխան Աննա Նաղդալյանը նշեց, որ այս պահին ավել մանրամասներ, քան դեսպանն է ասել, չի կարող հաղորդել։
