«Քանի միլիարդ ուզում է՝ թող պահանջվի, պետք է չխնայենք ոստիկանության բարեփոխումների համար». Արման Բաբաջանյան
ԱԺ անկախ պատգամավոր Արման Բաբաջանյանի կարծիքով՝ ոչինչ չպետք է խնայել ոստիկական համակարգում բարեփոխումները կյանքի կոչելու համար:
«Քանի միլիարդ ուզում է՝ պահանջվի, մենք ամեն օր պետք է ցույց տանք, որ նեցուկ և զորավիգ ենք մեր ոստիկանությանը, և այս բարեփոխումներն իսկապես կենսական կարևոր են»,- նշեց պատգամավորը՝ անդրադառնալով «Ոստիկանությունում ծառայության մասին» և «Ոստիկանության մասին» օրենքներում փոփոխություններ և լրացումներ կատարելու վերաբերյալ նախագծերի փաթեթի ընդունման հարցին:
Նա ԱԺ ամբիոնից նաև տեղեկացրեց, որ այս պահին բողոքի ակցիա է ընթանում Արարատի մարզի Հովտաշատ գյուղում: Գյուղացիները բողոքում են, իսկ ոստիկանները համավարակի պայմաններում իրենց պարտականություններն են կատարում, և հասկանալիորեն վիճակը գնալով լարվում է:
«Մենք այսօր վարակի ռեկորդային թիվ ենք ունեցել՝ 517 դեպք, արդեն հատել ենք 10 հազարի շեմը: Որպես Ազգային ժողով, կարծում եմ, պետք է նախաձեռնող լինենք ներգրավվելու այն որոշումների կայացմանը, որը պարետատունն է կայացնում, որպես ԱԺ՝ չենք կարող անմասն մնալ այդ գործընթացից: Ինձ զանգահարում են բժիշկներ, արտերկրում գտնվող մեր հայրենակիցները, բոլորն էլ շատ անհանգստացած են, այս իրավիճակը մեզ պարզապես չի կարող մի կողմում թողնել: Կարծում եմ՝ մեր ընդդիմադիր գործընկերներն իրենց շահը պետք է մի կողմ դնեն, և ամբողջությամբ լծվենք մեկ նպատակի՝ կյանքեր փրկելու նպատակին»,- շեշտեց պատգամավորը:
Մանրամասները՝ 168.am-ի տեսանյութում
