«Պրոֆեսիոնալ կադրեր պահելու համար պետք է հլա մի բան էլ բարձրացվեն աշխատավարձերը». Սուրեն Գրիգորյան
«Օրենքը բացահայտ ասում է, որ ԿԲ աշխատավարձը չպետք է լինի ցածր, քան միջին բանկայինը։ Այս պահի դրությամբ մենք այդտեղ շեղում ունենք, և նախորդ երկու տարիներին մեծ թվով բանիմաց մարդկանց կորցրել ենք հենց այդ պատճառով»,- ԱԺ-ում այս մասին ասաց ԿԲ նախագահի «Իմ քայլը» խմբակցության առաջադրած թեկնածու Մարտին Գալստյանը։
Նա նշեց, որ ըստ իրենց հարցումների՝ մարդկանց առնվազն կեսը ԿԲ-ից դուրս է գալիս այն պատճառով, որ առևտրային տիրույթում ստանում են մի քանի անգամ ավելի գումար, քան ԿԲ-ում.
«Ես շնորհակալ կլինեմ, եթե ինչ-որ մի պահի այս շենքում այդ թեմայի մասին սկսենք խոսել։ Այն աշխատավարձը, որն առաջարկում է ԿԲ-ն, որակյալ կիբեր-անվտանգության, ՏՏ մասնագետ, որակյալ իրավաբան կամ ֆինանսիստ ներգրավելը չափազանց ծանր խնդիր է։ Հիմա նոր եկողները գալիս են, մի քանի ամիս մնում են ԿԲ-ում, մեկ էլ 3 անգամ ավելի աշխատավարձով առաջարկ են ստանում ու գնում։ Այդ միֆն էլ կա, որ ԿԲ-ում բոլորը չաղ-հարուստ են, բայց դա իրականում միֆ է»։
Պատգամավոր Սուրեն Գրիգորյանը նկատեց. «Այսինքն՝ ըստ էության, մենք ԿԲ-ում ունենք այն նույն խնդիրը, որն առհասարակ ունենք պետական համակարգում, որ մի կողմից առնվազն հրահրվում է որոշակի հանրային ընկալում, որ՝ ինչի՞ պետք է աշխատավարձերը պետական սեկտորում բարձրանան, բայց Ձեր պատասխանից ես հասկացա, որ շատ կոնկրետ համընկնում կա այն քաղաքական ուղերձների, որն այսօր իշխանությունն ուղղում է, որ՝ ոչ, պետք է պրոֆեսիոնալ կադրեր պահելու համար հլա մի բան էլ բարձրացվեն աշխատավարձերը»։
Մարտին Գալստյանն ընդգծեց, որ նույնիսկ, եթե իշխանությունը դրա մասին չբարձրաձայնի, ժամանակի թելադրանք է, և շուկան է որոշում դա. «Այսինքն՝ եթե ուզում ես, որ քեզ մոտ աշխատեն նորմալ, բանիմաց, պրոֆեսիոնալ մարդիկ, ովքեր մտահոգված են այս հասարակության խնդիրները լուծելով, դու այդ մարդկանց պետք է բավարար չափով կոմպենսացնես իրենց կատարած աշխատանքի համար ու իրենց ներդրումների համար։ Ավելացնելու բան չունեմ, ուղղակի ուզում եմ շնորհակալություն հայտնել, որ այդ տեսակետը կա այս շենքում»։
