Չինաստանում կորոնավիրուսի բռնկման առավելակետն անցել է. փորձագետ
Չինաստանում նոր կորոնավիրուսի բռնկումն արդեն հասել է առավելակետին, վարակման նոր դեպքերի թիվն աստիճանաբար նվազում է, եւ ապագայում հարկ է սպասել իրադրության բարելավման: Փետրվարի 17-ին այս տեսակետն է հայտնել Ուհան քաղաքում թոքաբորբով ախտահարվածների բուժման համար «Լեյշենշան» մասնագիտացված հիվանդանոցի գլխավոր բժիշկ Վան Սինհուանը։
«(Կորոնավիրուսի դեմ պայքարի) շրջադարձային պահն արդեն եկել է: Ինչ վերաբերում է ախտահարվածներին, արձանագրված շատ դեպքեր վերաբերում են արդեն ավելի վաղ հայտնաբերվածների կատեգորիային: Բարձր ջերմությամբ պացիենտների թիվն, ըստ իմ դիտարկումների, նվազում է հինգերորդ օրն անընդմեջ»,- մեջբերում է նրա խոսքը Չինաստանի կենտրոնական հեռուստատեսությունը:
Փորձագետը վստահություն է հայտնել, որ հիվանդացածների թվի նոր կտրուկ բարձրացում արդեն տեղի չի ունենա, հաղորդել է ՏԱՍՍ-ը:
