Ավելի քան 36 մլն եվրո․ Հայաստանը հերթական վարկն է վերցնում․ «Ժողովուրդ»
«Ժողովուրդ» օրաթերթը գրում է․ «ՀՀ եւ Ասիական զարգացման բանկի միջեւ նախատեսվում է ստորագրել «Հանրային արդյունավետության եւ ֆինանսական շուկաների երկրորդ ծրագիր» վարկային համաձայնագիր: Համաձայնագրով նախատեսվում է Հայաստանին տրամադրել բյուջետային աջակցության վարկ` 36 մլն 506 հազար եվրո գումարի չափով: Ծրագրի հիմնական նպատակն է հզորացնել Հայաստանի հարկաբյուջետային կայունությունը, ինչպես նաեւ զարգացնել ֆինանսական եւ կապիտալի շուկաները:
Ծրագրի շրջանակը, մասնավորապես, ներառում է` պետական պարտքի եւ հարկաբյուջետային ռիսկերի կառավարման հզորացում, փողի շուկայի իրացվելիության եւ ֆինանսական շուկայի թափանցիկության բարելավում եւ կորպորատիվ պարտքի եւ բաժնետիրական կապիտալի շուկաների զարգացում:
Պարզվում է` ՀՀ կառավարությունն այսօրվա իր նիստում հավանություն կտա նաեւ երկրորդ վարկային համաձայնագրի ստորագրմանը: Այսպես, նշենք, որ ՀՀ ֆինանսների նախարարության, շրջակա միջավայրի նախարարության եւ Վերականգնման վարկերի բանկի (KfW) միջեւ նախատեսվում է ստորագրել «Քաղաքականության վրա հիմնված վարկ – Շրջակա միջավայրի պահպանություն» վարկային համաձայնագիրը: Ըստ դրա` նախատեսվում է Հայաստանին տրամադրել բյուջետային աջակցության վարկ` 40 մլն եվրո գումարի չափով: Նշված միջոցներն ուղղվելու են «2019թ. պետական բյուջեի մասին» ՀՀ օրենքով սահմանված պակասուրդի ֆինանսավորմանը»:
Ամբողջությամբ կարող եք կարդալ թերթի այսօրվա համարում:
