«Որևէ մեկը չպետք է իր վարքը և գործունեությունը պայմանավորի մյուսի վարքով և գործունեությամբ». Սերժ Սարգսյան
Այսօր Հայաստանի Հանրապետական կուսակցության (ՀՀԿ) Անդրանիկ Մարգարյանի անվան քաղաքական դպրոցի շրջանավարտները ստանում էին իրենց ավարտական դիպլոմները: Այն նրանց անձամբ հանձնեց ՀՀ երրորդ նախագահ, ՀՀԿ նախագահ Սերժ Սարգսյանը:
«Շնորհավորում եմ բոլորիդ ՀՀԿ Անդրանիկ Մարգարյանի քաղաքական դպրոցն ավարտելու կապակցությամբ: Վստահ եմ, որ այստեղ ձեռք բերած ձեր գիտելիքները տարբեր կուսակցություններում, հասարակական կազմակերպություններում կօգտագործեք ի բարօրություն մեր երկրի: Հայաստանը միշտ կարիք է ունեցել, հիմա՝ առավել ևս, խելացի, մասնագիտական լավ կարողություններ ունեցող մարդկանց, ճիշտ և ժամանակին որոշում կայացնողների, և, որ ամենակարևորն է՝ հայրենիքը սիրող մարդկանց: Մեր հայրենիքի առաջ ծառացել են բազմաթիվ խնդիրներ, և ես վստահ եմ, որ դուք ազնվորեն կլծվեք դրանց լուծմանը: Մեր երկրի առջև ծառացած խնդիրների լուծումը պայմանավորված է նրանով, որ յուրաքանչյուրն իր ոլորտում, իրեն վստահված բնագավառում կարողանա կատարել իր առջև դրված խնդիրը, սա է կարևոր: Մարդիկ փորձում են գտնել պատճառներ, թե վերևում լավ չեն կառավարում, ուստի մենք չենք կարող լավ աշխատել, վերևից էլ մեղքը գցում են ներքևի վրա՝ ասելով, թե ժողովուրդը գիտակից չէ: Որևէ մեկը չպետք է իր վարքը և գործունեությունը պայմանավորի մյուսի վարքով և գործունեությամբ»,- իր շնորհավորական խոսքում ասաց ՀՀ երրորդ նախագահ Սերժ Սարգսյանը:
ՀՀԿ Անդրանիկ Մարգարյան քաղաքական դպրոցի շրջանավարտները հենց այս դպրոցն են ընտրել, որովհետև, ըստ իրենց, այստեղ են դասավանդում լավագույն քաղաքագետները, պրոֆեսիոնալ դասախոսները: Շրջանավարտները նաև վստահեցնում են, որ դպրոցը կուսակցական սկզբունքով չի առաջնորդվում, այնտեղ կարող են կրթություն ստանալ բոլոր ցանկացողները:
ԱՆԱՀԻՏ ՀՈՎՀԱՆՆԻՍՅԱՆ
