ԱԳՆ խոսնակը՝ Զոհրաբ Մնացականյանի՝ BBC-ին տված հարցազրույցի արձագանքների մասին
ՀՀ ԱԳՆ մամուլի խոսնակ Աննա Նաղդալյանը 168.am-ի հետ զրույցում անդրադառնալով ԱԳ նախարար Զոհրաբ Մնացականյանի՝ BBC լրատվական ծառայության Hard Talk հաղորդմանը տված հարցազրույցին և դրան հաջորդած գնահատականներին, ասաց, որ հարցերին նախապես ծանոթացում չի եղել:
«Հարցերը չեն փոխանցվել: Առհասարակ ԱԳՆ-ն հարցազրույցների դեպքում նախապես հարցեր չի վերցնում: Մենք նման քաղաքականություն չունենք»,- նշեց նա:
Ինչ վերաբերում է հարցազրույցից հրաժարվելու պահանջներին՝ Նաղդալյանը շեշտեց, որ Հայաստանը պատրաստ է իր առաջնահերթությունները և մոտեցումները ներկայացնել ու պաշտպանել տարբեր հարթակներում:
«Այդ թվում՝ համաշխարհային մակարդակով ամենամեծ սփռումն ունեցող և սուր հարցադրումներով հայտնի միջազգային լրատվամիջոցներում, ինչը ևս մեկ անգամ հավաստում է աշխարհի հետ հաղորդակցվելու մեր ինքնավստահության և կարողության մասին»,- հավելեց ԱԳՆ մամուլի խոսնակը:
Մարիամ Պետրոսյան
