Ամերիկայի հայկական համագումարը ողջունել է հայկական արմատներով կոնգրեսականի կոչ-նամակը
Ամերիկայի հայկական համագումարը ողջունել է կոնգրեսական Աննա Գ. Էշուի՝ «Հարգելի գործընկեր» նամակը, որը կոչ է անում աջակցել Հայոց ցեղասպանության ճանաչման վերաբերյալ H.Res.296 բանաձևին: Այս մասին տեղեկացրին համագումարից:
«Իմ ընտանիքի անդամները եղել են այդ մարդասպանների մեջ: Իմ մայրը իմ տատի հետ փախել է Հայաստանից, իսկ հայրս՝ ասորի քրիստոնյա, քշվել է Մերձավոր Արևելքից: Երկուսն էլ ողջ կյանքի ընթացքում կրել են Օսմանյան թուրքերի վայրագրությունները: Կոնգրեսի որպես միակ հայկական- ասորական արմատներով անդամ, ես կոչ եմ անում ձեզ՝ հարգել այն անթիվ անհատներին և միանալ ձեր 112 կոլեգաներին` օժանդակելու բանաձևին, որը պաշտոնապես ճանաչում է Հայոց ցեղասպանությունը»,- նշում է Էշուն:
Էշուն կոնգրեսի միակ հայ-ասորի անդամն է: Կոնգրեսում իր ողջ գործունեության ընթացքում նա մշտապես աջակից է եղել Հայոց ցեղասպանության ճանաչմանը և ամբողջ աշխարհում կրոնի ազատությանը:
Նա շնորհակալություն է հայտնել ամերիկահայ համայնքի և Ամերիկայի հայկական համագումարին՝ Հայոց ցեղասպանության ճանաչման նպատակով ակտիվ աջակցության համար: Համագումարի՝ Կոնգրեսի հետ հարաբերությունների գծով տնօրեն Մարիամ Խալոյանը նշել է, որ համագումարը ողջունում է կոնգրեսականի ջանքերը և կշարունակի առաջ մղել օրենսդրության ընդունումը:
Ավելի վաղ՝ ապրիլին կոնգրեսականներ Ադամ Շիֆը և Գուս Բիլիրակիսին Հայոց ցեղասպանության վերաբերյալ նոր բանաձև ներկայացնելու նախաձեռնությամբ էին հանդես եկել: Նախագիծը միտված է Հայոց ցեղասպանության հերքումը մերժելուն, ԱՄՆ կառավարության կողմից Հայոց ցեղասպանության ճանաչմանն ու հիշատակմանը, Հայոց ցեղասպանության մասին իրազեկվածության բարձրացման կարևորությանը նմանատիպ հանցագործությունները հետագայում կանխելու առումով:
