Վիտալի Բալասանյանը պնդում է, որ տեղյակ է Նիկոլ Փաշինյանի և՛ վերելակային հանդիպման, և՛ Ղարաբաղին առնչվող բոլոր հանդիպումների մանրամասներին

Արցախի հերոս, «Հանուն Արցախ» համազգային շարժման նախաձեռնող Վիտալի Բալասանյանը քիչ առաջ լրագրողների հետ զրույցում կրկին վերահաստատեց իր հնչեցրած թեզը, որ այսօր Հայաստանի քաղաքական վերնախավն է սահմանադրական կարգի տապալման հեղինակը, և, որ Նիկոլ Փաշինյանը հանդիսանում է ղարաբաղյան հարցով Լևոն Տեր-Պետրոսյանի առաջ քաշած՝ «Սերգո ջան, լավ չենք ապրելու, մինչև Ղարաբաղը չհանձնենք» թեզի շարունակողը:

Վիտալի Բալասանյանը հիշեց նաև Ղարաբաղյան շարժման ժամանակ Վանո Սիրադեղյանի այցը, երբ Բալասանյանն իր զինակիցների հետ պաշարել էր Աղդամը:

Ըստ Բալասանյանի՝ այդ օրերին Վանո Սիրադեղյանն իրեն հասցրել է Հայաստանի քաղաքական վերնախավի, մասնավորապես՝ Լևոն Տեր-Պետրոսյանի կոչն Աղդամը լքելու և այն ադրբեջանական կողմին հանձնելու մասին:

Վիտալի Բալասանյանը վստահեցնում է, որ այս տեղեկության իսկության մեջ կարելի է համոզվել, օրինակ, հենց Վանո Սիրադեղյանի հետ զրուցելու ժամանակ:

«Ես հատուկ եմ ընտրում իմ բոլոր տերմինները, ես գիտեմ դրանց նշանակությունը»,- նշեց Վիտալի Բալասանյանը՝ ավելացնելով, որ ինքը տեղյակ է Նիկոլ Փաշինյանի և՛ վերելակային հանդիպման, և՛ Ղարաբաղին առնչվող բոլոր հանդիպումների մանրամասներին, որոնք կհայտնի, երբ ժամանակը գա:

Բալասանյանի խոսքով՝ ինքը մի քանի անգամ առաջարկություններով դիմել է Փաշինյանին:

Բալասանյանը վստահ է, որ Նիկոլ Փաշինյանն Արցախն ու Հայաստանը տանում է կործանման՝ պնդելով, որ երբեք չի եղել որևէ փաստաթուղթ, որի մասին Արցախյան իշխանությունները չեն իմացել:

Իսկ Նիկոլ Փաշինյանը, ըստ Բալասանյանի, «ստել է», երբ հայտարարել է, որ Արցախյան իշխանություններին հանձնել է ղարաբաղյանի հարցի կարգավորմանն առնչվող փաստաթղթեր, որոնք թաքցրել են նրանցից:

Աքսաննա Հայրապետյան