«Սա ռազմական գործողությունների սկսման նախաբան է». Գևորգ Գևորգյանը՝ Փաշինյան-Ալիև բանավեճի մասին
ԱՊՀ անդամ պետությունների ղեկավարների նեղ կազմով նիստի ժամանակ Փաշինյան-Ալիև երկխոսությունը ռազմական-քաղաքական գործիչ Գևորգ Գևորգյանը ռազմական գործողությունների սկսման նախաբան է որակում: Գևորգյանն ասում է՝ Ալիևին այսպես խոսելու հնարավորություն տվել է հենց վարչապետը:
«Փաշինյան-Ալիև հանդիպումը բնորոշում եմ՝ որպես ռազմական գործողությունների սկսման նախաբան: Այսօր ՀՀ իշխանությունն իր ապազգային քաղաքականությամբ մեծ դաշտ ստեղծեց Ալիևի և ադրբեջանի ժողովրդի համար՝ նման գռեհիկ և մարտական կոչերով հանդես գալու: Եթե, Աստված չանի, ռազմական գործողությունները սկսվեն հիմա, ի՞նչ է լինելու, ո՞նց ենք հետ շպրտելու: Առաջնագիծն առանց թիկունքի՝ թունավորված ու բաժանված ժողովրդով, շատ վտանգավոր է: Եթե ինչ-որ հաջողության հասենեն մեր թշնամիները, ապա մեղավորը կլինի այս իշխանության վարած քաղաքականությունը»,- ասաց Գևորգ Գևորգյանը:
Գևորգ Գևորգյանը պնդում է՝ Նիկոլ Փաշինյանի կողմից Գարեգին Նժդեհի մասին խոսելն անհեթեթություն է, քանի որ նա իր երկրի հերոսներին հետապնդում է ու արժեզրկում:
«Նժդեհի մասին խոսելն անհեթեթություն է, երբ իրենց հերոսները «քայլածներն ու պառկածներն» են, երբ թշնամություն է շուրջբոլորը, դրանից հետո խոսել նորից Նժդեհի մասին՝ դա պոպուլիստական դրսևորում է: Եթե ինքը նման պատասխան չտար, ի՞նչ էին անելու իրեն, ինքն անում է այն, ինչ կարող է՝ խոսում է»,- պնդում է Գևորգ Գևորգյանը:
ԱՆԱՀԻՏ ՀՈՎՀԱՆՆԻՍՅԱՆ
