Էրդողանը հայտարարել է՝ չի դադարեցնելու ռազմական գործողությունները Սիրիայում
Չնայած բազմաթիվ երկրների ու միջազգային կազմակերպությունների հնչեցրած զսպվածության կոչերին, Թուրքիայի նախագահ Ռեջեփ Թայիփ Էրդողանը հայտարարել է, որ Անկարան չի պատրաստվում հետ կանգնել և զորքերը դուրս բերել Սիրիայից ու դադարեցնել ռազմական գործողությունները։
«Մենք մաքրելու ենք Եփրատի արևմուտքը ահաբեկչական կազմակերպություններից, ապահովելու ենք մեր սահմանների անվտանգությունը, ապա սիրիացիներին կվերադարձնենք իրենց բնակավայրերը: Ով՝ ինչ ուզում է՝ թող խոսի, մենք կանգ չենք առնի: Մենք չենք պայքարում քրդերի դեմ, մեր պայքարն ահաբեկչական կազմակերպությունների դեմ է»,-ասել է Էրդողանը։
Երեք օրում «Խաղաղության ակունք» ռազմական գործողության հետևանքով մահացել է մոտ 400 քուրդ։ Զոհերի թվում կան նաև քաղաքացիական անձինք։ Անկարան շարունակում է զոհերի մեծացող թիվը հաղթանակ համարել։
ՄԱԿ-ի վերջին տվյալներով Սիրիայի հյուսիսից տեղահանվել է 100 հազար մարդ։ Նրանց մի մասը ապաստան է գտել դպրոցներում, հանրակացարաններում։
«Խաղաղության ակունք» ռազմական գործողությունը Թուրքիան սկսել էր հոկտեմբերի 9-ին։ Թուրքիան նպատակ ունի այս գործողությամբ Սիրիայի հյուսիսը մաքրել Անկարայի տեսանկյունից ահաբեկիչ քրդերից ու թուրք-սիրիակն սահմանը դարձնել խաղաղ միջանցք։ Ռազմական գործողության ընթացքում թուրքական ուժերը նաև ռմբակոծել են սիրիական Կոբանի շրջանում ԱՄՆ զինված ուժերին։ Պենտագոնը հաստատել է այս լուրը, ավելացրել, որ ամերիկյան կողմում զոհեր չկան։
Միջազգային հանրության համար թուրքական «Խաղաղության ակունք» ռազմական գործողությունը նոր հումանիտար աղետի ահազանգ է։
Հրապարակման պատրաստեց 168.am-ը
