Հովիկ Աբրահամյանի գրասենյակը հերքում է
Սեպտեմբերի 1-ին 168.am-ի՝ «Ասում են՝ Հայաստանում բան է փոխվել։ «Ֆերմերային Շարժում» հ/կ նախագահ Սարգիս Սեդրակյանի Ոչինչ էլ չի փոխվել, ավելի վատ է. Օլիգարխները ոնց գործել են, այնպես էլ շարունակում են գործել» հրապարակման մեջ «Ֆերմերային Շարժում» հ/կ նախագահ Սարգիս Սեդրակյանը, խոսելով ջերմոցների մասին, որպես օրինակ նշել էր Արարատում տարածված լուրերը՝ «Ասում ես՝ էս հողն ումն է, էս ջերմոցն ումն է, «Կոշկավոր կատվի» մուլտֆիլմի նման բոլորն ասում են՝ «մարկիզ Կարաբասինը», այսինքն՝ Հովիկ Աբրահամյանինը»։
ՀՀ նախկին վարչապետ Հովիկ Աբրահամյանի գրասենյակն այսօր հերքում է տարածել, որում ասվում է. «Ցանկանում ենք տեղեկացնել, որ նշված հոդվածում տեղ են գտել Հովիկ Աբրահամյանի անունը արատավորող տեղեկություններ՝ զրպարտանք։ Հրապարակայնորեն ներկայացված տեղեկությունը որևէ աղերս չունի ՀՀ նախկին վարչապետ Հովիկ Աբրահամյանի հետ։
Մասնավորապես, «Ֆերմերային Շարժում» հ/կ նախագահ Սարգիս Սեդրակյանի խոսքում իրականությանը չի համապատասխանում և արատավորում է Հովիկ Աբրահամյանի պատիվն ու արժանապատվությունը, հետևյալ պնդումը, թե Արարատի մարզում հսկայական ջերմոցներ կան, որոնք ասում են Հովիկ Աբրահամյանինն է։
Սույնով խնդրում ենք Ձեզ, հրապարակել վերոնշյալ հոդվածով Հովիկ Աբրահամյանի պատիվն ու արժանապատվությունը արատավորող և զրպարտող տեղեկությունների հերքումը»։
