«ԼՂ հակամարտությանը հարկավոր է քաղաքական հանգուցալուծում, որը կհամապատասխանի միջազգային իրավունքի սկզբունքներին»․ Դոնալդ Տուսկ
«ԼՂ հակամարտությունը չունի ռազմական լուծում»,- այս մասին այսօր ՀՀ կառավարությունում ՀՀ վարչապետ Նիկոլ Փաշինյանի հետ համատեղ ասուլիսի ընթացքում հայտարարեց Եվրոպական հանձնաժողովի նախագահ Դոնալդ Տուսկը՝ անդրադառնալով ԼՂ հակամարտության կարգավորման գործընթացին։
Դոնալդ Տուսկը նշեց, որ ԵՄ-ն շարունակում է լիարժեք սատարել ԵԱՀԿ Մինսկի խմբի համանախագահների ջանքերին՝ Հելսինկյան եզրափակիչ ակտի վրա հիմնված։ Նա տեղեկացրեց, որ ԵՄ քաջալերված է այս տարվա զարգացումների դինամիկայով և պատրաստ է աջակցել ժողովուրդներին խաղաղության պատրաստելու գործին՝ կենտրոնանալով մարդասիրական խնդիրների վրա։
Նա ընդգծեց, որ ԵՄ-ն նաև ԵԱՀԿ ՄԽ համանախագահների դիրքորոշումն է կիսում վերջին զոհերի վերաբերյալ։
«Երկու կողմերն էլ պետք է միջոցներ ձեռնարկեն վերականգնելու նպաստավոր միջավայր խաղաղության հասնելու համար։ Հակամարտությունը ռազմական լուծում չունի։ Այստեղ քաղաքական հանգուցալուծում է պետք, որը կհամապատասխանի միջազգային իրավունքի սկզբունքներին։ ԵՄ-ն սատարում է խաղաղության գործողություններին և պատրաստ է աջակցել ժողովուրդներին խաղաղության նախապատրաստելու կոնկրետ քայլերին»,- ասաց նա։
