Դատախազությունը կարճել է Ազգային արխիվի տնօրենի գործը
ՀՀ տարածքային կառավարման և զարգացման նախարար Սուրեն Պապիկյանը Հայաստանի ազգային արխիվի հարցով 2018 թվականի հունիսին դիմել էր ՀՀ գլխավոր դատախազ Արթուր Դավթյանին և իր քայլը հիմնավորել էր նրանով, որ բողոքներ է ստացել Ազգային արխիվում չարաշահումների վերաբերյալ ու այն մասին, որ տնօրենը ոմանց չի թույլատրում օգտվել արխիվներից:
168.am-ի հետ զրույցում Ամատունի Վիրաբյանը հայտնեց, որ գործը կարճվել է՝ հանցակազմի բացակայության հիմքով:
«Ես իմ վրա որ վստահ չլինեի՝ երբ ասացին, թե՝ դիմում գրի, դուրս արի, կանեի այդ բանը, ո՞նց կարող է ինձ վրա վստահ չլինեի»,- ասաց Ազգային արխիվի տնօրենը:
Հավելենք, որ Ամատունի Վիրաբյանն Ազգային արխիվը ղեկավարում է արդեն 15 տարի, նա այդ պաշտոնը զբաղեցրել է 2003 թվականից։ Պաշտոնավարման ժամկետը լրանալու է 2020 թվականի նոյեմբերին:
Հիշեցնենք, որ ՀՀ տարածքային և կառավարման նախարար Սուրեն Պապիկյանն Ազգային արխիվի տնօրեն Ամատունի Վիրաբյանից հրաժարականի դիմում էր պահանջել 2018թ. հունիսի 20-ին:
Ավելի վաղ՝ մայիսի 21-ին, 37 հոգի՝ Ազգային արխիվի աշխատանքից դժգոհ մի շարք քաղաքացիներ, այդ թվում և քաղաքագետ-միջազգայնագետ, «Մոդուս Վիվենդի» կենտրոնի հիմնադիր ղեկավար Արա Պապյանը, ԱՄՆ Դենվեր քաղաքի Կոլորադոյի համալսարանի միջազգային հարաբերությունների դասախոս Սիմոն Մաղաքյանն ու մի շարք լրագրողներ, գրող հրապարակախոսներ, մանկավարժներ ու հոգեբաններ բաց նամակ էին ուղարկել ՀՀ տարածքային և կառավարման նախարար Սուրեն Պապիկյանին՝ պահանջելով Վիրաբյանի հրաժարականը: Նրանք կարևորել էին Հայաստանի ազգային արխիվն իր բոլոր գործառույթներով օրինական դաշտ բերելը՝ առանց կամայականությունների:
Անի Կարապետյան
