Դավիթ Ղազարյանին կալանավորելու որոշման դեմ պաշտպանական կողմի ներկայացրած բողոքի վերաբերյալ որոշումը կհրապարակվի վաղը
Սույն թվականի ապրիլի 8-ին Երևանի ընդհանուր իրավասության դատարանը բավարարել էր «Սպայկա» ընկերության տնօրեն Դավիթ Ղազարյանին կալանավորելու՝ ՊԵԿ քննիչի միջնորդությունը, միաժամանակ մերժել փաստաբանների գրավի միջնորդությունը։
Ապրիլի 12-ին «Սպայկա» ընկերության տնօրեն Դավիթ Ղազարյանի պաշտպանները վերաքննիչ բողոք են ներկայացրել Դ.Ղազարյանին կալանավորելու՝ Երևանի ընդհանուր իրավասության առաջին ատյանի դատարանի ապրիլի որոշման դեմ։
ՀՀ վերաքննիչ քրեական դատարանում` դատավոր Մհեր Արղամանյանի նախագահությամբ, այսօր շարունակվում է «Սպայկա» ընկերության սեփականատեր և տնօրեն Դավիթ Ղազարյանի պաշտպանների բերած բողոքի քննությունը՝ Առաջին ատյանի դատարանի որոշման դեմ:
Քիչ առաջ ավարտվեց «Սպայկա» ընկերության հիմնադիր-տնօրեն Դավիթ Ղազարյանին կալանավորելու որոշման դեմ պաշտպանական կողմի ներկայացրած բողոքի քննությունը։
Ղազարյանի պաշտպան Կարեն Սարդարյանը լրագրողներին տեղեկացրեց, որ որոշումը կհրապարակվի վաղը՝ ապրիլի 30-ին, ժամը 10։30-ին։
Հիշեցնենք, որ առանձնապես խոշոր չափերով հարկերը չվճարելու դեպքի կապակցությամբ հարուցված քրեական գործի շրջանակներում 2019թ. ապրիլի 4-ին Ղազարյանին մեղադրանք է առաջադրվել ՀՀ քրեական օրենսգրքի 205-րդ հոդվածի 2-րդ մասի (առանձնապես խոշոր չափերով hարկ, տուրք կամ պարտադիր այլ վճար չվճարելը) հատկանիշներով։
Ըստ ՊԵԿ հաղորդագրության՝ «Սպայկա» ընկերությունը պետական բյուջե չի վճարել ընկերության կողմից իրականացված ձեռնարկատիրական գործունեության արդյունքում առաջացած 7 036 666 312 ՀՀ դրամ մաքսատուրք և հարկ:
