«Քաղաքացիական պայմանագիր» կուսակցության անդամը հեռացել է կուսակցությունից. մանրամասներ

168.am-ին հետաքրքիր մանրամասներ են հայտնի դարձել օրերս՝ «Մարիոթ» հյուրանոցում «Քաղաքացիական պայմանագիր» կուսակցության անցկացրած փակ համաժողովից։ Վարչապետ Նիկոլ Փաշինյանի և համախոհների կողմից 2015 թվականի ապրիլին հիմնադրված «ՔՊ» կուսակցության չորրորդ համաժողովին երիտասարդ կուսակցականներից մեկը տհաճ անակնկալ է մատուցել քաղաքական ուժի առաջնորդ Փաշինյանին ու կուսակիցներին:

Ավելի քան 5 ժամ տևած համաժողովին ընթացքում, առնվազն 40 հին ու նոր կուսակցականների ելույթներից, երկար-բարակ ինքնագովեստի ճառերից հետո, երբ վարչապետ Փաշինյանը հարցրել է՝ ո՞վ է ուզում ելույթ ունենալ, ձեռք է բարձրացրել կապանցի կուսակցական մի երիտասարդ:

Հրավիրվել է ամբիոն, բայց նա ձայնի իրավունք ստանալուց հետո կաշկանդվել ու որոշել է տեղից ելույթ ունենալ: Սկզբում ափսոսանք է հայտնել, որ, եթե վստահ լիներ՝ իր ձայնը լսելի կդառնա, մի լավ կպատրաստվեր, բայց այն, ինչ հայտարարել է երիտասարդը՝ առանց պատրաստվելու էլ կարողացել է զարմացնել ՔՊ-ականներին:

Տիգրան անունով երիտասարդն անցյալ վաղակատար ձևաբայով է խոստովանել կուսակցության հանդեպ իր սիրո, հավատի ու ոգեշնչման մասին: Տիգրանը հուսահատ հիշել է, որ հավատում էր կուսակցության գաղափարներին՝ դեռ անցած տարի, ափսոսանքով հիշել է, թե ոնց էր սատարում հեղափոխությանն ու հռչակված սկզբունքներին, ոնց էր վարակում իր միջավայրի մարդկանց, որպեսզի միանային նախկին վարչակարգը տապալելու արշավին, պայքարեին հանուն Նոր Հայաստանի ձևավորման:

Ու այս ամենի համար, ասել է, որ չի զղջացել, բայց ափսոսանք է հայտնել Տիգրանը, որ այսօր՝ համազգային շարժումից մեկ տարի անց, հակառակում է համոզվում, ցավով արձանագրել է, որ ինքն ու իր համախմբած մարդիկ հետհեղափոխական Հայաստանում գրեթե չեն տեսնում փոփոխություններ, և, որ շատ ու շատ դեպքերում ներկայիս իշխանավորները նույնիսկ կրկնում են հին բարքերը:

Տիգրանն իր հիասթափությունն է հայտնել նաև Փաշինյանի գլխավորած «Քաղաքացիական պայմանագիր» կուսակցության ներսում տիրող մթնոլորտի վերաբերյալ, կարծիք է հայտնել՝ ասելով, որ իր հարազատ նորաստեղծ կուսակցության ներսում՝ իշխանական ուժ դառնալուց հետո, ինչ-որ ներքին խմորումներ են ընթանում, մարդիկ խմբավորվում են մի քանի անձանց շուրջ ու լուռ պայքարում են միմյանց դեմ, ինչը նա անազնիվ ու վտանգավոր է համարել:

Տիգրանը համոզմունք է հայտնել, թե ՔՊ-ն իշխանափոխությունից առաջ և հետո որակապես փոփոխություն է կրել, ու, որ նեգատիվ երևույթները ոչ թե կանխվում, այլ հաճախ խրախուսվում են կուսակցության ներսում:

Նա թվել է իր հիասթափությունների պատճառներն ու դրանցով պայմանավորված իր որոշման մասին է հայտնել՝ թե իբր ինքն ավելի լավն է, և, որ տեղ չունի այդ ամենում, ուստի որոշել է դադարեցնել կուսակցությանն իր անդամությունը: Երիտասարդ կապանցու անկեղծանալն անակնկալի է բերել կուսակիցներին, մեկը մյուսին տարակուսած հարց ու փորձ են արել երիտասարդի ով լինելու մասին, փորձել են պարզել կուսակցության շարքերը համալրելու նրա կապերը և այլ մանրամասներ: Իսկ Տիգրանն իր վրդովմունքը հայտնելուց հետո անմիջապես լքել է դահլիճը:

Մեզ թեև հաջողվեց գտնել քառամյա պատմություն կերտած «Քաղաքացիական պայմանագիր» կուսակցությունն առաջինը լքած ծիծեռնակին, նրա ով լինելը, սակայն նրա հետ կապ հաստատել չհաջողվեց, որպեսզի պարզեինք որոշման իրական պատճառները:

Հազիվ 30 տարեկան երիտասարդին, հնարավոր է, բաժին չի հասել հեղափոխությունից հետո կուսակցության նվաճած պետական ապարատի անթիվ-անհամար պաշտոններից մեկը, կամ գուցե նա հիասթափված է իր հասակակից նախարարների գոռոզանալուց: Միգուցե կապանցու հիասթափության ետևում հարազատ մարզի չլուծվող, անուշադրության արժանացած սոցիալական խնդիրներն են… պատճառները շատ կարող են լինել, բայց ամենից հավանականը, թերևս, երիտասարդի մոտ էյֆորիկ ապրումներից սթափ դատողությունների անցումային շրջանն է երևի:

Մեզ հետ զրույցում կուսակցականներից շատերը կատարվածը փոքրիկ դրվագ էին համարում, խորհուրդ էին տալիս կարևորություն չտալ, խորացող ճեղքեր չփնտրել կուսակցության ներսում: Ավելին, այս շփումներից պարզ դարձավ, որ երկրի ղեկավարի կառավարած կուսակցության ներսում Տիգրանի ելույթին անդրադառնում են՝ որպես երևույթ, քննարկում են հանդուգն կուսակցի պահվածքը՝ համարձակության ու անհեռատես լինելու պրիզմայով, սակայն նրա ասածներից հետևություներ կարծես թե չեն անում: Երևի այն պատճառով, որ Տիգրանի զգացածն ու ընկալածը չեն զգում պաշտոնի հմայքը վայելելու ու փողի համը զգալու պատճառով:

Ի դեպ, երիտասարդը հեղափոխությանը միացել է առաջին իսկ օրերից, երբ դեռ քչերն էին հավատում «քայլողներին»։ Նա Փաշինյանին ուղեկցել է առաջին իսկ օրերից։ Իսկ «քայլելը», նկատենք, որ «Քաղաքացիական պայմանագիր» կուսակցությունում լուրջ վաստակ է համարվում։

Սյուզի Բադոյան