Ուկրաինան հրաժարվել է «Եվրատեսիլ-2019» երգի մրցույթին մասնակցությունից
Ուկրաինան հրաժարվել է մասնակցել «Եվրատեսիլ-2019» երգի մրցույթին: Այս մասին հայտնել է Ուկրաինայի Ազգային հեռուստառադիոընկերությունը:
«Հանրային հեռարձակողը կարող էր ազգային ընտրության մասնակիցների թվից ընտրել ցանկացածին, սակայն հրաժարվում է նման այլընտրանքից, քանի որ հարգանքով է մոտենում ազգային ընտրության ժամանակ հեռուստադիտողների ընտրությանը»,- ասվում է հայտարարության մեջ:
Ավելի վաղ Ուկրաինայում ազգային ընտրության եզրափակչի չորս մասնակիցներ հրաժարվել էին մասնակցել «Եվրատեսիլ-2019»-ին:
Ընտրական փուլի եզրափակչում հաղթել էր երգչուհի Մարուվը, ով հրաժարվել էր, սակայն, մասնակցությունից՝ նշելով, թե չի ցանկանում ինքն իրեն սահմանափակել Ուկրաինայի ազգային հեռուստառադիոընկերության հետ պայմանագրի դրույթներով: Դրանք մասնավորապես ենթադրում էին, որ երգչուհին չի կարող շփվել մամուլի հետ առանց համաձայնեցման: Բացի այդ, Մարուվը հայտարարել էր, որ չի ցանկանում հանդես գալ մրցույթում լոզունգներով և մտնելով քաղաքական շահարկումների դաշտ:
Երգչուհու կողմից մրցույթին մասնակցությունից հրաժարվելուց հետո առաջարկ էր արվել «Եվրատեսիլ-2019»-ին մասնակցել ազգային ընտրությունում երկրորդ տեղը գրաված Freedom-Jazz girls band խմբին: Վերջինս, սակայն, հրաժարվել էր՝ հայտնելով, որ եվրոպական պրոմոութերի հետ համաձայնագրի կնքման փուլում է: Երրորդ տեղը զբաղեցրած Kazka խումբը հայտարարել էր, որ չի մասնակցի «Եվրատեսիլ-2019»-ին, քանի որ իրենց հարկավոր չէ «հաղթանակ ցանկացած գնով»: Դրանից հետո չորրորդ տեղը գրաված Brunettes Shoot Blondes խումբը հայտարարել էր, որ չի մասնակցի մրցույթին, եթե իրենց առաջարկվի:
