Իզմիրլյանի անվան մանկատան պատուհանից երեխա է ընկել. այս պահին նրա կողքին է Զարուհի Բաթոյանը
2019 թ. հունվարի 24-ին Մարի Իզմիրլյանի անվան մանկատանը տեղի է ունեցել պատահար. խնամվող 11-ամյա Ա. Ն.-ն դաստիարակի ուղեկցությամբ գնացել է զուգարան:
Ուղեկցող դաստիարակը սպասել է, որ երեխան դուրս գա, բայց երեխան բացել է պատուհանը և ճաղավանդակների արանքից ընկել է ներքև: Այս մասին ասված է ՀՀ աշխատանքի և սոցիալական հարցերի նախարարության պարզաբանման մեջ:
«Տեղեկացնում ենք, որ երեխան ունի բավարար ինքնասպասարկման հմտություններ: Երեխան անմիջապես տեղափոխվել է հիվանդանոց և անցել համապատասխան հետազոտություններ: Վնասվել են տղայի ոտքերը, իրականացվել է անհրաժեշտ օգնություն:
Այս պահին երեխան մանկատանն է: Մանկատանն են նաև նախարար Զարուհի Բաթոյանը, նախարարի խորհրդական Արայիկ Արշակյանը: Հարցը իրավապահների ուշադրության կենտրոնում է»,-հավելել են պարզաբանման մեջ:
Իր հերթին նախարար Զարուհի Բաթոյանը ֆեյսբուքյան գրառում է արել՝ հայտնելով.
«Մանկատանը ծանոթացա դեպքի մանրամասներին, հանդիպեցի տղայի հետ: Չնայած վնասվածքներին առաջին բանը, որ տղան ուզեց, իր գնդակն էր: Երեխաների ֆիզիկական անվտանգությունն իմ ուշադրության կենտրոնում է: Նման դեպքերը բացառելու համար առաջիկայում հանձնարարականներ կստանան բոլոր հաստատությունների ղեկավարները»:
