«Այս քայլը կարող է ունենալ ամենաբացասական հետևանքները, նկատելիորեն կթուլացնի տարածաշրջանային և գլոբալ անվտանգությունը». Պուտին
Միջին եւ փոքր հեռահարության հրթիռների ոչնչացման վերաբերյալ պայմանագրից (ՄՓՀՀՊ) ԱՄՆ-ի դուրս գալը կարող է հանգեցնել սպառազինությունների եւ զանգվածային բնաջնջման զենքի (ԶԲԶ) չտարածման նկատմամբ վերահսկողության ողջ համակարգի փլուզման: Այդ մասին, ինչպես հաղորդել է ՏԱՍՍ-ը, հայտարարել է Ռուսաստանի նախագահ Վլադիմիր Պուտինը՝ ելույթ ունենալով ՌԴ պաշտպանության նախարարության կոլեգիայի ընդլայնված նիստում:
«Լուրջ անհանգստություն է առաջացնում ԱՄՆ-ի հայտարարությունը Միջին եւ փոքր հեռահարության հրթիռների ոչնչացման մասին պայմանագրից դուրս գալու վերաբերյալ: Այս քայլը կարող է ունենալ ամենաբացասական հետեւանքները, նկատելիորեն կթուլացնի տարածաշրջանային եւ գլոբալ անվտանգությունը,-նշել է Պուտինը:
Փաստորեն հեռանկարում խոսքը կարող է վերաբերել սպառազինությունների եւ զանգվածային բնաջնջման զենքի չտարածման նկատմամբ վերահսկողության ողջ ճարտարապետության դեգրադացիային եւ նույնիսկ փլուզմանը»:
