«Հսկա գյուղ է, բայց զրոյական վիճակի. ի՞նչ են արել այսքան ժամանակ». Լևոն  Շիրինյանը զարմացել է

«Քրիստոնեա-ժողովրդական վերածնունդ» կուսակցության նախընտրական ցուցակը գլխավորող քաղաքագետ Լևոն Շիրինյանն ու թիմը քարոզարշավը սկսեցին Էջմիածնից:

Կուսակցության անդամներն աղավնի բաց թողեցին սուրբ Հռիփսիմե եկեղեցու բակում. «Սա սովորական աղավնի չէ, այլ նոյան առասպելական աղավնի է, որը ավետիսը բերեց վերազարթոնքի: Սա Հայաստանի վերակերպումի խորհրդանիշն է»,- ասաց Լևոն Շիրինյանը:

Կուսակցության անդամներն առաջինն այցելեցին Արմավիրի մարզի Շահումյան գյուղ:

«Եկել ենք ձեզ հանդիպելու և ասելու հետևյալը՝ Հայաստանը եթե արդյունաբերությունը չի վերականգնելու, աշխատատեղեր չեն լինելու: Մի կրպակը կամ գինու խանութը, ուր 10-15 հոգի են աշխատում, հարցի հիմնական լուծումը չեն»,- էջմիածինցիներին ասաց Լևոն Շիրինյանը:

Քաղաքացիները համաձայնեցին նրա հետ ու բարձրացրին իրենց համար կարևոր մի շարք հարցեր:

Բնակչուհիներից մեկն ասաց, որ բացակայում են աղբամանները, աղբը լցնում են շենքերի հետնամասում, որտեղ լրիվ  շուն ու կատու են:

Մյուսն էլ նշեց, որ  ունեն նաև գազի, ջրամատակարարման խնդիր, անգամ մանկապարտեզ չկա:

Բնակիչների հետ խոսելուց, խնդիրներին ծանոթանալուց հետո Լևոն Շիրինյանը 168.am-ի հետ զրույցում ասաց, որ զարմացած է.

«Առաջին անգամ լսեցի, որ Հայաստանում գյուղ կա, որը գազիֆիկացված չէ: Չէի լսել, դա իմ թերությունն է: Հսկա գյուղ է, բայց բառացիորեն զրոյական վիճակի: Բա ի՞նչ են արել այսքան ժամանակ»,- հարց բարձրացրեց քաղաքագետը:

«Քրիստոնեա-ժողովրդական վերածնունդ» կուսակցության ներկայացուցիչները եղան նաև Մրգաստան գյուղում:

«Կրկին բողոքող, փոփոխությունների կողմնակից, բայց դեռ դրանք չտեսած ժողովուրդ»,- նկատեց Լևոն Շիրինյանը:

Նրանք եղան նաև Հոկտեմբերյանում: Նրանց հյուրընկալեցին 12 երեխա ունեցող ընտանիքում: Ընտանիքի հայրն ասաց, որ ունի 4 տղա, մյուսներն աղջիկ են:

«Ֆուտբոլի թիմ է: Բայց փոխարինողներ էլ են պետք»,- կատակեց ընտանիքի հայրը:

Պարզեցին, որ նրանք զբաղվում են անասնապահությամբ ու այդպես ապրուստ վաստակում:

«Էս ի՞նչ համով խումբ է»,- տեսնելով հյուրերին՝ նշեց տան մեծ մայրիկն ու համբուրեց բոլորին:

«Այ, սա է քրիստոնեական սերը»,- նկատեց Լևոն Շիրինյանը:

Հիշեցնենք, որ կուսակցության կարգախոսն է՝ «Արարչագործական Հայաստան` հայուհուն վայել»: Սիմվոլը  ճերմակ աղավնին է՝ իր թռիչքի մեջ:

Անի Կարապետյան